Վիրավորանք համարվող արտահայտության համար հրապարակայնորեն ներողություն խնդրելու և փոխհատուցում վճարելու մասին ՀՀ ԱԺ անկախ պատգամավոր Թագուհի Թովմասյանի դիմումը դատարանը հետ է վերադարձրել։ Այս մասին տեղեկանում ենք Դատական տեղեկատվական համակարգից։
Նշվում է, որ Թագուհի Թովմասյանը 30․06․2021թ. հայցադիմում է ներկայացրել ՀՀ Երևան քաղաքի առաջին ատյանի ընդհանուր իրավասության դատարան` ընդդեմ Լենա Ռաֆայելի Նազարյանի` վիրավորանք համարվող արտահայտության համար հրապարակայնորեն ներողություն խնդրելու և փոխհատուցում վճարելու պահանջների մասին:
Քննության առնելով հայցադիմումը վարույթ ընդունելու հարցը` դատարանը գտնում է, որ այն ենթակա է վերադարձման` հետևյալ պատճառաբանությամբ.
ՀՀ քաղաքացիական դատավարության օրենսգրքի 127-րդ հոդվածի 1-ին մասի 4-րդ կետի համաձայն` առաջին ատյանի դատարանը վերադարձնում է հայցադիմումը, եթե չի ներկայացվել օրենքով սահմանված կարգով և չափով պետական տուրքի վճարումը հավաստող փաստաթուղթը կամ համապատասխան գանձապետական հաշվին փոխանցումը հավաստող համապատասխան ծածկագիրը՝ տրամադրված վճարահաշվարկային կազմակերպության կողմից, իսկ այն դեպքերում, երբ օրենքով նախատեսված է պետական տուրքի վճարումից ազատելու, դրա վճարումը հետաձգելու կամ դրա չափը նվազեցնելու հնարավորություն, ապա բացակայում է դրա վերաբերյալ միջնորդությունը, կամ դատարանն այն չի բավարարել։
Դատարանը հիմնավորումներ է ներկայացրել ու նշել է, որ հայցվորը ներկայացրել է մեկ ոչ գույքային պահանջ, որի համար պետք է վճարեր 4000 ՀՀ դրամ պետական տուրքի գումար և 1000000 ՀՀ դրամ գումարի բռնագանձման պահանջ, որի համար պետք է վճարեր 20000 ՀՀ դրամ պետական տուրքի գումար։ Այսինքն՝ ընդհանուր առմամբ հայցվորը պետք է վճարեր 24000 ՀՀ դրամ պետական տուրքի գումար, այնինչ վճարել է 8000 ՀՀ դրամ: Վերոնշյալ հիմնավորմամբ դատարանը գտնում է, որ հայցադիմումը ենթակա է վերադարձման:
Հիշեցնենք, որ ԱԺ անկախ պատգամավոր Թագուհի Թովմասյանը խիստ քննադատության էր ենթարկել ներկայիս կառավարությանը՝ անդրադառնալով Աբովյանի դիահերձարանում զոհվածների դիերի պահման դեպքին։ ԱԺ փոխնախագահ Լենա Նազարյանը, կարծելով, որ իր ձայնը չի լսվում, Թագուհի Թովմասյանին «իդիոտկա» էր անվանել։
Լրացուցիչ տեղեկությունների համար այցելեք կայք
Հայաստանի նորությունները Telegram-ում
#Թագուհի Թովմասյան #Լենա Նազարյան #Հայցադիմում