Արտահերթ խորհրդարանական ընտրություններում համակարգային խախտումներն իրենց նախադեպը չեն ունեցել: Այս մասին այսօր ՍԴ-ում ընտրությունների արդյունքները անվավեր ճանաչելու դիմումի քննության ժամանակ ասաց «Պատիվ ունեմ» դաշինքի ներկայացուցիչ, Արդարադատության նախկին նախարար Դավիթ Հարությունյանը: «Այդ խախտումները երկակի հարված կարող են հասցնել մեր պետությանը: Այդ խախտումներին կոշտ չարձագանքելը նաև դրանց թույլատրելիության պրակտիկան է ձևավորելու հեագա տարիների համար»,-ասաց նա՝ դիմումը ներկայացնելով 9 թեզերով: «Նախընտրական քարոզարշավի ժամանակ ՔՊ-ի 1-ին համարը, լինելով նաև հանրային իշխանության ներկայացուցիչ, կոպտորեն ոտնահարել է ազատ ընտրության սկզբունքը: Փաշինյանի վարքագիծը պարունակել է բռնության, ահաբեկման, վարչական ներգործության ու հետագա վրեժխնդրության հստակ տարրեր, որոնց արդյունքում ձևավորվել է վախի, լարվածության մթնոլորտ: Ընդ որում՝ Փաշինյանի կողմից շարունակաբար հնչող ատելության խոսքն ուղղված է եղել ոչ միայն քաղաքական մրացակիցներին, այլև պաշտոնատար անձանց ու ընտրողների առանձին խմբերի: Հարկ եմ համարում նշել, որ եթե Փաշինյանի խոսքն ուղղված լիներ միմիայն օրինախախտներին, թեև այդպես չէ, բայց անգամ այդ դեպքում իրավախախտներին անձամբ «ասֆալտին պառկեցնելու», «լեզուները կտրելու», վրեժ լուծելու սահմանադրական լիազորություն նա չունի»,-ասաց Դ. Հարությունյանը՝ նշելով, որ որևէ իրավական նորմ նման գործառույթ նրան չի վերապահում: «Ընտրություններից հետո Փաշինյանի չագուչը ողջ թափով ու հզորությամբ գործի է անցել և խոստացված կադրային ջարդի առաջին պտուղներն արդեն երևում են»,- հավելեց նա: