Հեղինակավոր BBC լրատվականն անդրադարձել է Ադրբեջանում գտնվող հայ ռազմագերիներին: Իր ծավալուն հրապարակման մեջ հոդվածի հեղինակ Օլգա Պրոսֆիրովան մանրամասնորեն ներկայացրել է հայ գերիների նկատմամբ տեղի ունեցող խոշտանգումների ու ծաղրանքի փաստերը:
Նրա զրուցակիցը Հին Թաղերում գերեվարված Սեդրակ Սողոմոնյանի հայրն է, որը ներկայացնում է որդու՝ գերի ընկնելու հանգամանքները:
Դեպքը տեղի է ունեցել նոյեմբերի 9-ի հայտարարության ստորագրումից հետո՝ դեկտեմբեր ամսին: Սեդրակն այդ ժամանակ հերթափոխի էր սպասում, նրանց խոստացել էին տուն ուղարկել, ինքն էլ փոխանցել էր հորը, որ գալու է:
Հին Թաղերը դեռևս ռուս խաղաղապահների վերահսկողության տակ չէր, այնտեղ հայերն էին կանգնած՝ թշնամուն դեմ առ դեմ: Նրանք, փաստացի, հայտնվել են շրջափակման մեջ և զենքի սպառնալիքի տակ զինաթափ եղել՝ ակնկալիքով, որ իրենց կհանձնեն ռուս խաղաղապահ զորախմբին, սակայն նրանց խաբեությամբ գերեվարել են:
«Մեզ ծեծում են, ծաղրում, բայց լավ ենք»: Այսպես են նկարագրում գերությունից վերադարձած հայ տղաներն իրենց վիճակը:
BBC-ն փորձել է Ադրբեջանից ճշտել, թե քանի՞ հայ գերի կա այնտեղ, սակայն ապարդյուն: Պաշտոնական Բաքուն խոսքը կտուրն է գցում:
«Նշենք, որ այսօր էլ հայկական կողմը չի կատարում նոյեմբերի 9-ին ստանձնած պարտավորությունները»,- պատասխանել է Ադրբեջանի ԱԳՆ պաշտանական ներկայացուցիչ Լեյլա Աբդուլաևան BBC-ի հարցմանը:
Բաքուն Արցախում իրենց հողը պաշտպանող տղաներին մեղադրում է լրտեսության, ահաբեկչության մեջ՝ պատճառաբանելով, որ նրանք ապօրինաբար են գտնվել Ադրբեջանի վերահսկողությանն անցած ԼՂ տարածքներում: Իսկ ՀՀ ՄԻՊ Արման Թաթոյանն ապավինում է իր հաշվարկներին՝ ասելով, որ Ադրբեջանում սեփական հաշվարկներով մոտավորապես 300 գերի կա, որոնց թվում քաղաքացիական անձինք են:
«Պատկերացրեք այդ մարդկանց ընտանիքների վիճակը: Նաև այն բոլորի, որոնք հույս են փայփայում, որ իրենց որդին ողջ է և գտնվում է գերության մեջ»,- ասել է Թաթոյանը BBC-ին:
Նշենք, որ գերիների վերջին 15 հոգանոց խումբը Հայաստան է վերադարձել հուլիսի 3-ին: Նրանց հայրենադարձման դեմ Ադրբեջանը ստացել է ականապատ դաշտերի քարտեզներ: Սա առաջին այսպիսի փոխանակումը չէ:
Լրացուցիչ տեղեկությունների համար այցելեք կայք
Հայաստանի նորությունները Telegram-ում
#BBC #Հայ գերիներ