Преподобный Петр, царевич Ордынский, был племянником хана Золотой Орды Бергая. В 1253 году святитель Кирилл, епископ Ростовский (память 21 мая), ходил в Орду для ходатайства о церковных нуждах своей епархии и рассказывал хану о чудесах, совершавшихся при мощах святителя Леонтия (память 23 мая). В числе слушателей был и юный племянник хана, на которого рассказ святителя произвел очень сильное впечатление. Через некоторое время у Бергая заболел сын. Вспомнив рассказ русского епископа об исцелениях, он вызвал святителя Кирилла, и по его молитвам больной исцелился. Хан щедро одарил святителя Кирилла и отпустил в епархию. На пути святителя догнал отрок, племянник хана Бергая, и умолил взять его с собой в Ростов. В Ростове отрок был крещен с именем Петр и женился. Святой Петр отличался любовью к молчанию, богомыслию и молитве. После чудесного явления ему апостолов Петра и Павла он построил при озере Неро монастырь в их честь. По смерти своей супруги, незадолго до своей кончины, святой принял иночество в основанной им обители. Скончался преподобный Петр в глубокой старости в 1290 году.
Тропарь преподобному Петру, царевичу Ордынскому, Ростовскому чудотворцу, глас 8
Оте́чества своего́, блаже́нне Пе́тре, удали́вся,/ и богоме́рзкую ве́ру отню́д возненави́дев,/ от тьмы́ во свет прише́л еси́,/ и всели́лся еси́ во сла́вный и многонаро́дный град Росто́в,/ в не́мже житие́ че́стно пожи́в,/ це́рковь во и́мя святы́х апо́стол Петра́ и Па́вла воздви́гл еси Христо́вою благода́тию,/ и сию́ чу́дными ико́нами, я́ко неве́сту украси́в,/ святи́теля же, и кня́зя, и вся лю́ди житие́м свои́м удиви́л еси́,/ те́мже и по сме́рти твое́й Христо́с да́ром чуде́с обогати́ тя./ Помина́й нас чту́щих пресве́тлую па́мять твою́, преподо́бне о́тче Пе́тре,// и моли́ Христа́ Бо́га, спасти́ся душа́м на́шим.
Кондак преподобному Петру, царевичу Ордынскому, Ростовскому чудотворцу, глас 4
Яви́ся ве́лие со́лнце Христо́вой Це́ркви,/ просвеща́я уче́ния светлостьми́, всече́стне,/ я́ко черпа́лом златы́м,/ от кла́дязя неиско́паннаго чуде́с поче́рпл еси́,/ от исто́чника неистощи́маго,/ на па́мять успе́ния твоего́ прише́дшим, всеблаже́нне Пе́тре,// ны́не всем подава́еши грехо́в проще́ние, сла́во преподо́бным.
Молитва преподобному Петру, царевичу Ордынскому, Ростовскому чудотворцу
О, преподо́бне Пе́тре царе́виче, Росто́вский чудотво́рче! Я́коже из мра́ка язы́ческаго во свет Ева́нгельскаго уче́ния Госпо́дь тя призва́, та́ко умоли́ Его́, да и нас по неизрече́нней Свое́й бла́гости и человеколю́бию и́змет всеси́льною Свое́ю десни́цею из тьмы грехо́вныя, и осия́ет сердца́ на́ша к де́ланию Его́ Боже́ственных за́поведей. Я́коже ты избе́г мяте́жа мирски́х волне́ний, во ангелоподо́бное безпеча́льное житие́ сподо́бился еси́ дости́гнути, та́ко сподо́би и нам гре́шным мо́ря сего́, вла́емаго страстьми́, пучи́ну безмяте́жно преплы́ти, име́я тя, о́тче, ко́рмчаго о Го́споде на́шем, и дости́гнути чи́стым покая́нием ко приста́нищу спасе́ния ве́чнаго. И я́коже име́л еси́ споспе́шников тебе́ верхо́вных апо́столов Петра́ и Па́вла в созида́нии оби́тели, та́ко подви́гни их умилосе́рдитися и о нас недосто́йных, и дарова́ти нам от сугу́быя апо́стольския бла́гости дерзнове́ние ко Христу́ Бо́гу. Ве́руем бо, я́ко а́ще мо́щи твоя́ святы́я и сокрове́нны в земли́, но ты ца́рствуеши со избра́нными Бо́жиими на Небеси́: исхода́тайствуй у́бо, да и нам гре́шным моли́твами твои́ми отве́рзется дверь Ца́рствия Небе́снаго в безконе́чныя ве́ки. Ами́нь.
Молитва вторая преподобному Петру, царевичу Ордынскому, Ростовскому чудотворцу
О, преподо́бне о́тче Пе́тре царе́виче, душе́ю на Небеси́ Престо́лу Бо́жию предстои́ши и Тро́ичныя сла́вы наслажда́ешися, те́лом же на земли́ в Боже́ственном хра́ме сем почива́яй, и да́нною ти свы́ше благода́тию разли́чная источа́яй чудеса́, при́зри ми́лостивым о́ком на предстоя́щия честне́й твое́й ра́це лю́ди и прося́щия уми́льно твоея́ по́мощи; се бо мы безме́рными согреше́нии пра́ведный гнев Бо́жий на ся наведо́хом и вся́кия ми́лости недосто́йни сотвори́хомся; тем же не сме́юще вознести́ очеса́ на́ша к высоте́ небе́сней, ниже́ вознести́ моле́бный глас ко Го́споду, се́рдцем сокруше́нным и смире́нным ду́хом тебе́ в хода́тайство и на по́мощь призыва́ем, испроси́ у Го́спода Це́ркви благостоя́ние, возду́ха благорастворе́ние, земли́ плодоно́сие; изба́ви всех, ве́рою несомне́нною к Бо́гу приходя́щих и к ра́це моще́й твои́х прибега́ющих, от вся́ких бед душе́вных и теле́сных; бу́ди печа́льным уте́шитель, неду́гующим врач, напа́ствуемым помо́щник, вдови́цам засту́пник, си́рым защи́тник, младе́нцам пита́тель, стра́нствующим путево́ждь, ста́рым укрепле́ние, пла́вающим ко́рмчий; исхода́тайствуй всем, твоея́ по́мощи тре́бующим, вся, я́же ко спасе́нию поле́зная, я́ко да твои́ми моли́твами наставля́еми, путь маловре́меннаго жития́ бе́збедне соверши́м, улучи́м на Небеси́ ве́чный поко́й и просла́вим всех благи́х Да́теля, в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в, ами́нь.
