Երեկ Արցախում քաղաքացիները նախագահ Արայիկ Հարությունյանի հրաժարականի պահանջով հավաքվել էին Ստեփանակերտի Վերածննդի հրապարակում։ Armenia Today-ի հետ զրույցում Արցախի ԱԺ «Արդարություն» խմբակցության պատգամավոր Մետաքսե Հակոբյանն անդրադարձել է Արցախում առկա տրամադրություններին, խոսել նաև բողոքի հետագա գործողությունների մասին։
Հիշեցնենք, որ Արայիկ Հարությունյանը շնորհավորել էր Նիկոլ Փաշինյանին վերընտրվելու կապակցությամբ։ Երեկ Հարությունյանի հրաժարականը պահանջող քաղաքացիները նշում էին, որ արցախցին չի կարող շնորհավորել Նիկոլ Փաշինյանին։ Մետաքսե Հակոբյանը մեզ հետ զրույցում նշեց, որ խնդիրը միայն շնորհավորանքը չէ։
«Այս գործընթացը հասունացել էր․ բոլորս՝ թե՛ քաղաքական գործիչները, թե՛ հանրությունը միշտ սովոր են եղել ՀՀ իշխանությունների հետ համագործակցութանը։ Այդ համատեղ աշխատանքը բարենպաստ է եղել մեր երկու հայկական պետությունների համար։ Սակայն վերջին երեք տարիների ընթացքում, ցավոք, Արցախում ձևավորվեց այնպիսի իշխանություն, որը սատարեց Հայաստանում իշխանությունը զավթած այն անձանց, որոնք մատի մեկ շարժումով ուղղակի վերացրեցին 30 տարիների ապրելու իմաստը, նաև հազարավոր զոհերի ու խեղված կյանքերի պատճառ դարձան։ Այնուամենայնիվ, մենք Արցախում ավելի զուսպ էինք ուզում գտնվել՝ հասկանալով, որ թշնամու ուղիղ նշանառության տակ ենք, և ցանկացած գործողություն կարող է վնաս բերել Արցախին, քան եղել է առ այսօր։ Մենք հուսով էինք, որ ՀՀ-ում բնակվող մեր հայրենակիցները կհասկանան այն իրական վտանգը, որում նաև իրենք են և ընտրությունների արդյունքում կձևավորվի այնպիսի իշխանություն, որը կգործի ի նպաստ ողջ հայությանը։ Ցավոք, մեր հայրենակիցների ավելի քան 50 տոկոսը չտեսավ այդ վտանգը ու ընտրեց ազգակործան իշխանություններին, որի հետևանքները դեռ տեսնելու ենք։ Արդյունքում՝ արցախցուն այլևս ոչինչ չմնաց, քան պայքարը տեղափոխել Արցախ»,-ասաց մեր զրուցակիցը։
Մետաքսե Հակոբյանը նշեց, որ համբերության բաժակը լցվել է հատկապես այն տեսանյութից հետո, որտեղ ակնհայտ երևում է, որ Արայիկ Հարությունյանը քվեների արդյունքների ամփոփման ընթացքում ժամանել էր «Քաղաքացիական պայմանագրի» շտաբ։ «Արցախի նախագահն իր քայլերով վերացրեց նախագահի ինստիտուտը և նախագահից ուղղակի ՔՊ-ական ակտիվիստի վերածվեց։ Սա վերաբերում է նաև իր ամբողջ թիմին, աջակիցներին ու կուսակցությանը»,-ասաց նա։ Նա հայտնեց, որ երեկ մոտ 2000 մարդ է դուրս եկել փողոց՝ պահանջելով Արայիկ Հարությունյանի հարժարականը։ Մետաքսե Հակոբյանը հայտնեց, որ այսօր քաղաքացիները նույն պահանջով ժամը 18։00-ին լինելու են Ստեփանակերտի Վերածննդի հրապարակում։
«Ամուսիններ Մերի Դավթյանը և Դավիթ Ավանեսյանը երեկվանից հացադուլ են հայտարարել։ Պայքարը համաժողովրդական է, որևէ քաղաքական ուժ կանգնած չէ այս ամենի հետևում։ Իսկ մենք, որպես ժողովրդի մի մասնիկ, մասնակցելու ենք այսօրվա հավաքին՝ թույլ չտալով որևէ բախում ու սադրանք, որովհետև ինֆորմացիա ունենք, որ Արայիկ Հարությունյանը ժամը վեցին, ժողովրդին հակառակ հավաք է կազմակերպելու։ Մենք ինֆորմացիա ունենք, որ իր խամաճիկներն այս պահին շրջում են գյուղերով ու գյուղապետերին հրահանգում , որ մարդկանց իբր ի պաշտպանություն Արայիկ Հարությունյանի հրապարակ դուրս բերեն։ Եվ դա արվում է գումարի դիմաց»,-ասաց նա։ Նշենք, որ մեր զրույցից հետո Արցախի նախագահը հայտարարեց, որ այսօր բոլորին հրավիրում է Վերածննդի հրապարակ, որտեղ հանդես ուղերձով է հանդես գալու։ Ստացվում է, որ այսօր նույն վայրում և նույն ժամին Արցախում տարբեր հավաքներ են լինելու։ Մետաքսե Հակոբյանը նշեց, որ Արայիկ Հարությունյանի հրաժարականն այլընտրանք չունի։ «Այլընտրանքն Արցախը թուրքին հանձնելն է, հայաթափությունն է, որովհետև Հայաստանի և Արցախի իշխանություններն այս երեք տարիների ընթացքում այդ ծրագիրն իրականացնելու ուղղությամբ են աշխատել, ինչն իրենց մասամբ հաջողվել է։ Բայց ինչքան էլ փորձեն արցախցու կերպարն աղավաղել, մինույն է, արցախցին կպած է իր հողին»,-եզրափակեց մեր զրուցակիցը։ Հիշեցնենք, որ դեռ անցած տարվա նոյեմբերին Արցախի խորհրդարանի 4 կուսակցություններ պահանջեցին Արայիկ Հարությունյանի հրաժարականը։Արդեն 2021 թվականի մայիսին նրա հրաժարականը պահանջեցին Արցախի Ազգային ժողովի «Արդարություն»,«Հայ Յեղափոխական Դաշնակցություն» և «Արցախի ժողովրդավարական կուսակցություն» խմբակցությունները։
Լրացուցիչ տեղեկությունների համար այցելեք կայք
Հայաստանի նորությունները Telegram-ում