«Ի՞նչ պատասխան տամ հոգեկան հիվանդի տվայտանքներին։ Թող գնա դեղերը խմի՝ կամ չի խմել, կամ էլ դեղաչափը փոխելու ժամանակն է»,- այսպես արձագանքեց Մեղրիի քաղաքապետ Մխիթար Զաքարյանը՝ Նիկոլ Փաշինյանի այն հայտարարությանը, թե Սյունիքի մի քանի ապաշնորհ պաշտոնյաների խորհուրդ է տալիս ինքնակամ պառկել ասֆալտին, «սելֆի» անել և հրապարակել Facebook սոցիալական ցանցում։
Երեկ և այսօր Սյունիքի մարզում քարոզարշավ իրականացնող վարչապետի պաշտոնակատարն արդեն երկրորդն նման հայտարարությունն է անում մարզի պաշտոնյանների հասցեին։
Վարչապետի պաշտոնակատարը հունիսի 15-ին էլ Մեղրի, Գորիս, Քաջարան, Սիսիան համայնքներում կրկին խոսել էր մարզում ղեկավար պաշտոն զբաղեցնողների մասին՝ նշելով, որ կան ապաշնորհ, հակապետական պաշտոնյաններ։
Մխիթար Զաքարյանը խոստովանում է՝ երբեք հակապետական որևէ քայլ չի արել և այսօր էլ չի անում։
«Իմ կենսագրությունն էլ նայեք, իրենն՝ էլ։ Ամբողջ կյանքում՝ դպրոցական տարիներիս սկսած, եղել եմ պետությանը նվիրված։ Մեր հայկական բանակին ծառայում եմ մինչև այսօր։ Միշտ գործել եմ ի նպաստ մեր պետությանը՝ փորձելով ուժեղացնել մեր երկիրը։ Իսկ նայեք իր անցած ճանապարհը՝ դասալիք, դավաճան, թերի կրթություն։ Վերջին 3 տարիներին տեսնում ենք, թե ով է հակապետական գործունեություն իրականացնում։ Փաշինյանը պետականության հետ կապված ամեն ինչ քայքայում է»,- Armenia Today-ի հետ զրույցում նկատեց նա։
Մեղրիի համայնքապետը վրդովվել է նաև Փաշինյանի մեկ այլ հայտարարությունից։ Սյունիքի քարոզարշավի ժամանակ Նիկոլ Փաշինյանն ասել է, թե մարզի համայնքապետերին սպասում են քրեական օրենսգիրքն ու քրեակատարողական հիմնարկները։
Մխիթար Զաքարյանը դեմ չէ պատիժ կրելուն, եթե օրենք է խախտել։ Ասում է՝ վերջին շրջանում Հայաստանում այնպիսի ստուգող կազմակերպություն չկա, որին չի ընդունել։ Նրանք, սակայն, ձեռնունայն են հեռացել։
«3 ամսվա մեջ 6-րդ ստուգող հանձնաժողովին եմ ընդունել և ճանապարհել։ Փողոցայինի պես իմ քաղաքում, իմ հասցեին արտահայտություններ է իրեն թույլ տալիս։ Չի կարելի մտնել մի տարածք, որտեղ բնակչության ավելի քան 90 տոկոսը համայնքապետին ձայն են տվել, նման հայտարարություն անել։ Ինքը չի էլ հասկանում, թե ինչ է նշանակում տղամարդուն ասել՝ կպառկեցնեմ ասֆալտին։ Ես չեմ իջնում նրա մակարդակին։ Ինքը չի էլ հասկանում տղամարդկային հարաբերություններից»,- ասաց նա։
Հիշեցնենք, որ Գորայքում քարոզարշավի ժամանակ վարչապետի պաշտոնակատար Փաշինյանը հայտարարել էր, որ Սյունիքի մի քանի ապաշնորհ պաշտոնյաների խորհուրդ է տալիս ինքնակամ պառկել ասֆալտին, «սելֆի» անել և հրապարակել Facebook սոցիալական ցանցում։
Լրացուցիչ տեղեկությունների համար այցելեք կայք
Հայաստանի նորությունները Telegram-ում
#մխիթար զաքարյան #նիկոլ փաշինյան #նախընտրական քարոզարշավ