Մեր խմբում չկան «տաբու» թեմաներ․ մենք խոսում ենք ամեն ինչի մասին և քննարկում ամեն ինչ։ Այս մասին այսօր՝ հունիսի 14-ին տեղի ունեցած ՔՊ քարոզարշավի ժամանակ լրագրողի հետ զրույցում ասաց «Իմ քայլը» խմբակցության ղեկավար Լիլիթ Մակունցը՝ մեկնաբանելով Դիանա Գասպարյան-Սուրեն Պապիկյան հեռախոսազրույցի ձայնագրության արտահոսքը։
Նա ասաց, որ ամբողջովին ներգրավված են քարոզարշավի մեջ և քիչ նշանակություն են տվել դրան։ «Դա չափազանց անկարևոր թեմա է»,- ասաց Մակունցը։ Հարցին, թե թիմի ներսում կա՞ն անհամաձայնություններ, եթե Էջմիածնի քաղաքապետն էլ է ասում, որ Փաշինյանին այլընտրանք է պետք, պատասխանեց․ «Ես չեմ կարող որևէ մեկի փոխարեն պատասխանել»։ Հիշեցնենք, որ երեկ՝ հունիսի 13-ի երեկոյան, համացանցում արագորեն տարածվեց ՏԿԵ նախարարի պաշտոնակատար Սուրեն Պապիկյանի ու Էջմիածնի քաղաքապետ Դիանա Գասպարյանի հեռախոսազրույցը։ Այն ենթադրաբար կայացել է պատերազմից հետո։ Գասպարյանը հավանաբար պատրաստվում է դիմում գրել, իսկ Պապիկյանը համոզում է չանել դա, սպասել մինչև առավոտ, որ վիճակը կայունանա։
Ձայնագրության մասին մեկնաբանություն ստանալու նպատակով Armenia Today-ը կապ էր հաստատել ՏԿԵՆ խոսնակ Արմինե Մուրադյանի հետ։ Վերջինս ասել էր, որ մեկնաբանելու ոչինչ չունի։ Հարցին, թե կլինի՞ պաշտոնական բացատրություն, պատասխանել էր, որ եթե լինի՝ կտեղեկացնեն։ Իսկ Էջմիածնի քաղաքապետը չէր պատասխանել մեր զանգերին։
Լրացուցիչ տեղեկությունների համար այցելեք կայք
Հայաստանի նորությունները Telegram-ում
#Լիլիթ Մակունց #Սուրեն Պապիկյան #Դիանա Գասպարյան #Գասպարյան Պապիկյան ձայնագրություն