Բացարձակապես անընդունելի եմ համարում մեղադրանքի կասկածը, որ առաջադրվել է ինձ, որովհետեւ ես բավականաչափ տիրապետում եմ օրենքներին և որեւէ զանցանք, որևէ հանցանք և օրենքի խախտում ես երբեք չեմ կատարել իմ գործողություններով: Հետևապես այդ գործը, որ կարվել է, առաջադրվել է ինձ, իր մեջ նյութ չի պարունակում։ Այդ գործը փուչիկ է, որը փուչիկի նման պայթելու է: Այս մասին մամուլի ասուլիսի ժամանակ նշեց «Հայաստան» դաշինքի ցուցակում ընդգրկված անվանի բժիշկ Արմեն Չարչյանը:
«Եթե իրապես հիմք չկա, բայց բոլոր դեպքերում ինձ ձերբակալում են, դա նշանակում է, որ եղել է հստակ հրահանգ, խստագույնս պահանջ է եղել, որպեսզի ինձ ձերբակալեն: Այս գործողություններով բացահայտեցին իմ ուժն ու հնարավորությունը: Սա ցույց տվեց, որ այս գործը բացառապես քաղաքական երանգ ունի և բացառապես կախված է իմ քաղաքացիական և քաղաքական դիրքորոշումից»,-ասաց նա՝ նշելով, որ քրեաիրավական համակարգի բոլոր աշխատակիցների կողմից հարգալից վերաբերմունքի է արժանացել։
«Բացարձակապես մի կողմ պետք է դնել իմ բոլոր ծառայություններն այս երկրի հանդեպ, իմ առողջական վիճակը և մնացած բոլոր հարցերը ու հարցը դիտարկել զուտ իրավական հարթության մեջ: Օրենքի առաջ բոլորս հավասար ենք: Հարցը պետք է դիտարկել նաև բարոյական տիրույթում»,-ասաց Չարչյանը:
Հարցին, թե ինքն ի վերջո ուղղորդե՞լ է «Իզմիրլյան» ԲԿ-ի աշխատակիցներին, Չարչյանը պատասխանեց. «Դուք իմ ձայնագրության մեջ ուղղորդման տարր գտե՞լ եք: Չեք գտել, որովհետև չկա»:
Հիշեցնենք, որ դատարանը բավարարել է փաստաբաններ Էրիկ Ալեքսանյանի և Արամ Վարդևանյանի բողոքը՝ պրոֆեսոր, անվանի բժիշկ Արմեն Չարչյանի ձերբակալման դեմ։ Պրոֆեսորի ձերբակալման դեմ նրանց բողոքի վերաբերյալ որոշումը հրապարակել է առավոտյան։
Հիշեցնենք, որ մամուլում տարածվել էր ձայնագրություն՝ Արմեն Չարչյանի կողմից իրեն ենթակա աշխատակիցների նկատմամբ ճնշում գործադրելու վերաբերյալ: ՀՔԾ-ում հարուցվել էր քրեական գործ ՝ ՀՀ քրեական օրենսգրքի 154.2-րդ հոդվածի 4-րդ մասի 2-րդ կետով նախատեսված ծանր հանցանք կատարելու կասկածանքով Ա. Չ.-ն ՀՀ հատուկ քննչական ծառայության քննիչի կողմից ձերբակալվել էր:
Լրացուցիչ տեղեկությունների համար այցելեք կայք
Հայաստանի նորությունները Telegram-ում
#Ասուլիս #Արմեն Չարչյան #Քրգործ