Гомер буе бергә эшләгән, шатлыгын да-кайгысын да бергә кичергән хезмәттәшләрнең гаиләләре - ирләре, балалары, оныклары, хәтта туганнары да бик якын була бит. "Әгерҗе хәбәрләре"ндә 40 елга якын баш бухгалтер булып эшләүче хөрмәтле дустыбыз Вәзирә Чураеваның җәмәгате РИНАТ та безнең өчен менә шундый якын кеше иде...
Редакциядә ир-атлар булмаганлыктан, Гагарин урамындагы элекке бинабызда эшләгәндә ирләр кулы таләп ителә торган нинди генә проблема килеп чыкса да, Ринатка мөрәҗәгать итә идек. Бервакытта да кире какканы булмады. Төнге сменадан кайтса да, инструментларын тотып килеп җитә иде. Куллары алтын иде шул аның. Нәрсәгә тотынса, шуны булдыра, кайберәүләр кебек "ярар әле" дип кенә эшләмәде, җиренә җиткереп, яхшы сыйфатлы итеп башкарды. Бәйрәмнәрдә, туган көннәрдә дә Ринат иң беренчеләрдән булып котлый иде.
Әгерҗедә язын ул сукалаган бакчалар күпме булгандыр... Әле быел да бер танышым "Ринат кебек тирән итеп, кәс калдырмыйча сукалаучы юк хәзер. Ул сукалаганнан соң җир мамык кебек кала иде", дип сагынып искә алды.
Вәзирә белән тырышып-тырмашып үз көчләре белән хан сарае хәтле матур йорт төзеп керделәр. Айгөл белән Лилиананы кияүгә биреп, биш оныкларына сөенеп, тормышлары җиткәч, парлашып тигезлектә яшәр чак җиткәч кенә... каты авыру аяктан екты аны. Вәзирә, кызлары, кияүләре кадерле кешеләренең гомерен озайту өчен күпме генә тырышсалар да... мәрхәмәтсез авыру Ринатыбызны арабыздан алып китте...
Бүген менә шундый киң күңелле, чын Кеше булган дустыбыз РИНАТНЫҢ мәңгелеккә китүенә бер ел. Вәзирәгә, балаларына тормышларының терәге, таянычы булган иң газиз кешеләреннән башка бер ел яшәүнең ничек авыр икәнен бик яхшы аңлыйбыз. Үзебезнең дә Ринатны сагынып искә алмаган көнебез юк...
Урының җәннәт түрләрендә булсын. Без сине гомер буе сагынып, юксынып яшәрбез инде, РИНАТ...
Матбугат ветераны Рәмзия Зарипова