«Կավկասուս Օնլայն»-ին այլընտրանքային ինտերնետ ցանց Հայաստանի համար կա՛․ Սաղյան

Ինչպես ավելի վաղ հայտնի էր դարձել՝ «Կավկասուս Օնլայն» (Caucasus online) ընկերության մնացորդային 51 տոկոսանոց մասնաբաժինը ադրբեջանցի է ձեռք բերել։

Ի՞նչ վտանգներով է հղի այս փաստը հայաստանյան ինտերնետ ցանցի համար, ի՞նչ է անելու Հայաստանը հնարավոր ցանցային «անակնկալների» դեպքում։ Այս հարցերի շուրջ Armenia Today-ը զրուցեց «Ինտերնետ հանրություն» ՀԿ փոխնախագահ Գրիգոր Սաղյանի հետ։

Սաղյանն ասաց, որ ընկերության տնօրինությունն ու սեփականատերը բոլորովին փոխկապակցված չեն որևէ պարտականությունով։ Դա նշանակում է, որ մեկի պարտականությունների համար մյուսը պատասխանատու չէ։ 

Վրաստանի կարգավորիչ մարմնի միակ հնարավորությունը եղել է արտաքին կարգավորողի նշանակումը։ Այսինքն՝ ընկերության ղեկավար նշանակել է հենց այդ կարգավորող մարմինը։

Սաղյանը չի կարծում, որ ընկերության անմիջական տնօրենը կխախտի որևէ պայմանագիր, քանի որ դա նրա անձնական պատասխանատվության տակ է։

Որպես հնարավոր այլընտրանք՝ Սաղյանը նշեց Իլոն Մասկի կողմից ստեղծված Neuralink ցանցին միանալու Հայաստանի հնարավորությունը։ Այդ ընկերությունը պարունակում է 1300 արբանյակ, որոնք պտտվում են ողջ երկրագնդով ու ծածկում նաև Հայաստանը, ընդամենը ամսական 100 ԱՄՆ դոլարով կարելի է սպառել այդ ցանցի հնարավորությունները՝ նախապես կատարելով փոքր ծախս։ Պետք է ուղղակի ձեռք բերել 500 դոլարանոց սարք և միանալ ցանկացած ինտերնետային կետի։

«Պահեստային տարբերակն արդեն առկա է մատչելի գներով։ Եթե սրանից 2 տարի առաջ այդ գիծը կարժենար միլիոնավոր դոլարներ, ապա այսօր կարելի է շրջանցել «Կավկասուս Օնլայն»-ի միացումը։ Բացի այդ՝ հայկական ընկերությունները «Կավկասուս Օնլայն»-ի հետ պայմանավորվածություն ունեն, որ տրաֆիկը չի ուղարկելու Բաքվի միջոցով»,- ասաց մասնագետը։  

Նշենք, որ ընկերության 51% բաժնեմասի՝ ադրբեջանցիների կողմից ձեռքբերման փաստին անդրադարձել է նաև ԼՀԿ պատգամավոր Անի Սամսոնյանը։ Նա հարցում է ուղարկել ԲՏԱ նախարարություն՝ ճշտելու, թե ի՞նչ անվտանգային խնդիրներ կարող է ստեղծել գործարքը Հայաստանի համար, սակայն նախարարությունից պարզաբանումներ չեն տվել։ 

Հիշեցնենք, որ 2021 թվականի մարտի 24-ին ընկերության հանձնաժողովը տարածել է հայտարարություն՝ նշելով, որ 2020թ. օգոստոսին «NEQSOL Holding» ընկերությունների խմբի սեփականատեր, ադրբեջանցի գործարար Հասանովը ձեռք է բերել վրացական «Caucasus online» ընկերության բաժնեմասերի մնացած 51%-ը՝ այսպիսով դառնալով ընկերության 100% բաժնեմասերի անօրինական սեփականատերը:

Լրացուցիչ տեղեկությունների համար այցելեք կայք

#«Կավկասուս Օնլայն» #Իլոն Մասկ #Գրիգոր Սաղյան