ԱՄՆ կոնգրեսական Ջեքի Սփիերը Twitter-ի իր միկրոբլոգում անդրադարձել է հայ-ադրբեջանական սահմանին տեղի ունեցող իրադարձություններին:
«Ադրբեջանը ներխուժել է Հայաստանի տարածք և սպառնում է տարածաշրջանի կայունությանը։ Կոչ եմ անում ԱՄՆ պետքարտուղար Էնթոնի Բլինքենին դատապարտել Ադրբեջանի կողմից Հայաստանի ինքնիշխանության խախտումը և ճնշում գործադրել Ադրբեջանի վրա՝ ադրբեջանական զորքերի անհապաղ դուրսբերման նպատակով»,- հայտարարել է Ջեքի Սփիերը:
Հիշեցնենք, որ մայիսի 12-ին ՀՀ պաշտպանության նախարարությունը հայտնել էր, որ վաղ առավոտյան ադրբեջանական զինված ուժերը «սահմանի ճշգրտման» նպատակով փորձել են «որոշակի աշխատանքներ» իրականացնել Սյունիքի մարզի Սև լճի տարածքում: ՊՆ-ից հայտնել են, որ հայկական ստորաբաժանումների ձեռնարկած միջոցառումներից հետո ադրբեջանցի զինվորականները դադարեցրել են այդ աշխատանքները, բանակցություններ են ընթանում իրավիճակի կարգավորման ուղղությամբ:
ՀՀ վարչապետի պաշտոնակատար Նիկոլ Փաշինյանը մայիսի 12-ի երեկոյան հրավիրել է Անվտանգության խորհրդի նիստ, որի ընթացքում տեղի ունեցած իրադարձություններն անվանել է ոտնձգություն Հայաստանի Հանրապետության տարածքում: Նա տեղեկացրել է, որ շուրջ 250 ադրբեջանցի զինծառայողներ հատել են Հայաստանի պետական սահմանը և խորացել 3,5 կմ: Մայիսի 14-ին Նիկոլ Փաշինյանը դիմել է ՀԱՊԿ Հավաքական անվտանգության խորհրդի գործող նախագահ, Տաջիկստանի Հանրապետության նախագահ Էմոմալի Ռահմոնին ՝ Հավաքական անվտանգության մասին պայմանագրի 2-րդ հոդվածի դրույթների իրականացման շրջանակներում, հանձնարարել անհապաղ գործի դնել արտակարգ խորհրդակցությունների մեխանիզմը ՝ ՀԱՊԿ անդամ պետությունների դիրքորոշումները համակարգելու և առաջացած վտանգը վերացնելու համար միջոցներ ձեռնարկելու նպատակով:
Լրացուցիչ տեղեկությունների համար այցելեք կայք
Հայաստանի նորությունները Telegram-ում
#ԱՄՆ կոնգրեսական Ջեքի Սփիեր #հայ-ադրբեջանական իրադարձություններ #ԱՄՆ