Москва ашәҟәҭыжьырҭа "МАКС Пресс" аҟны иҭыҵит аҧшьаҩыра Аҟуран аҧсышәала (ҵакыла аиҭага).
Аиҭага авторс дамоуп аҵарауаҩ, афилологиатә ҭҵаарадыррақәа рдоктор, апрофессор, Аҧснытәи аҳәынҭқарратә университет аҭҵаараус апроректор Џьулетта Ианкәа-иҧҳа Адлеиба. Аҵарауаҩ Аҟуран аиҭагара аус адылулон акыршықәса инеиҧынкыланы.
"Аҟуран аҧсшәахь еиҭагоуп аоригинал ахәҭақәа - асурақәеи аиатқәеи зегьы реиҿкаашьа еицамккәа, рҵакы еиҭамырскәа аҧсшәа ианрааланы, аканон текстқәа ҵакыла реиҭагаразы аҭҵаараус аҿы ахархәара змоу азнеишьақәеи аҧышәақәеи инарықәыршәаны, аурыс бызшәахьи, егьырҭ абызшәақәа рахьи Аҟуран аиҭагақәа иреиӷьу ҳәа иҧхьаӡоу хшыҩзышьҭра рзуны. Ари аҭыжьымҭа иагәылоуп Аҟуран аоригинал текстгьы", - аҳәоит ашәҟәы аннотациаҿы.
Аҧшьаҩыра аҧсышәала аҭыҵра акрызҵазкуа хҭыс дуӡӡоуп ҳаҧсуа доуҳатә культуразы. Ҳазшаз илыҧха, игәаҧхара шәыгымхааит, акыр иаҧсоу ҳаҧхьаҩцәа!
* * *
Аҟуран аҟынтә:
"Иа Раби! Иаҳхылаҧшхәу! Ҳуашьапкуеит Улыҧха-Угәыҧха ҳауҭаразы, аиашамҩа ҳануҵаразы, ҳагәнаҳақәа ҳанаужьразы, иаҳзымдыруа ҳаҭоумҵаразы, алашареи, агәыцқьареи, аманшәалареи, абарақьаҭреи, ахаирреи ҳаҭәоушьаразы ари адунеи аҿгьы, Ахараҭ аҿгьы! Уара, нас, Лыҧха Змоу, Гәыҧха Змоу Уоуп, Уажәа - Аҵабырг ауп, Анажьра Злоу Уоуп, Амчхара зегьы Зымҽхакыу Уоуп. Амин!"