Районыбызның актив яшьләре катнашында «Акыл көрәше» дип аталган интеллектуаль уены узды. Аралашу, күңел ачу, акыл көчен сынау форматындагы чараны район башкарма комитеты, яшьләр эшләре һәм спорт бүлеге, "Яшьлек" яшьләр үзәге һәм ТР Аграр яшьләр берләшмәсенең район бүлекчәсе оештырды.
Җиңүче булып “Оптимистлар” (финанс-бюджет палатасы: Ләйсән Хәйрединова, Илвир Вәлиуллин, Ләйсән Шәймарданова, Инзил Мостафин) командасы табылды. “Җиңүне үзебез дә көтмәгән идек. Тарихи сораулар авыр булып тоелган иде. Беренче урынга чыгуыбызга без бик шат”,–дип кичерешен уртаклашты Ләйсән Хәйретдинова. Алардан 2гә генә ким балл җыйган Саба аерым фәннәрне тирәнтен өйрәнү мәктәбе зыялыларына 2нче урын бирелде. Өченче урынга да шулай ук финанс-бюджет палатасының “Активисты” командасы чыкты. Аларга, Ирек Гарипов әйткәнчә, акчалы сертификатлар бирелде.