Аԥсны Аҳәынҭқарра Аҵареи абызшәатә политикеи рминистр актәи ихаҭыԥуаҩс дҟаҵоуп Ада Кәарҷелиаҧҳа. Абри атәы аанацҳауеит Fasebook аминистрра адаҟьа.
Кәарҷелиа Ада Алықьса-иҧҳа диит мшаҧымза 15, 1970 шықәсазы ақалақь Аҟәа, Аҧснытәи АССР.
1987 шықәсазы далагеит Н. А. Лакоба ихьӡ зху Аҟәатәи 10-тәи ашьхарыуаа рышкол.
Иара убри ашықәс азы дҭалеит Аҧснытәи аҳәынҭқарратә университет афилологиатә факультет.
1988 шықәсазы диасуеит Қарҭтәи аҳәынҭқарратә университет афилологиатә факультет Кавказтәи абызшәақәа рыҟәшахьы. Уаҟа лҵара хлыркәшоит 1992 шықәсазы.
1994 шықәсазы аусура далагоит Аҧснытәи аҳәынҭқарратә университет аҧсуа бызшәа акафедраҿы.
2018 шықәса инаркны 2020 шықәсанӡа аус луан Аҳәынҭқарратә бызшәатә политиказы Аҧсны Аҳәынҭқарратә еилакы аҟны, аԥсуа бызшәа аметодист хадас (иаԥсыуам школқәа рҿы).
2021 шықәсазы аусура далагеит Аҧсны Ахәынҭқарра Аҵареи абызшәатә политикеи рминистрра аҟны, аԥсуа бызшәа аметодистс (иаԥсыуам школқәа рҿы).
Лырҵаратә усура ашықәсқәа ирылагӡаны еиқәлыршәеит аҧсуа бызшәа арҵаразы еиуеиԥшым арҵагатә цхыраагӡатәқәа: «Аҧсуа бызшәа 20 урок рыла» аелементартә ҩаӡара, «100 тестк актәи абызшәатә ҩаӡаразы», «20 тема аҽаршьцыларақәа рыцны», «Аԥсуа бызшәа 20 урок рыла» аҩбатәи аҩаӡара, «Еицаҳҵоит аҧсуа бызшәа» арҵага шәҟәы акомплект 2 акласс азы уҳәа уб иҵ.