Аҧснытәи аҳәынҭқарратә университет аректорати, аҟазарақәа рыҟәша апрофессор-рҵаҩратә еилазаареи 65 шықәса ихыҵра идырныҳәалоит еицырдыруа аҧсуа сахьаҭыхҩы-аҿыханҵаҩ, аскульптор, атеоретик, аҳәынҭқарратәи ауаажәларратәи усзуҩы, асахьаҭыхыҩцәа Жәларбжьаратәи рхеидкыла "Аҧсны-АРТ" ахантәаҩы, акультуреи аҭҵаарадырреи рзы Аҧсны Ахада иабжьгаҩ, Аҧснытәи аҳәынҭқарратә университет аҟазарақәа рыҟәша анапхгаҩы, асахьаҭыхратә ҟазареи адизаини ркафедра адоцент Нугзар Ҷыҷыкәа-иҧа Логәуа.
Ҳаҭыр зқәу Нугзар Ҷыҷыкәа-иҧа !
Аҧснытәи аҳәынҭқарратә университет аректорати аҟазарақәа рыҟәша апрофессор-рҵаҩратә еилазаареи рыхьӡала гәык-ҧсыкала ишәыдаҳныҳәалоит 65 шықәса шәхыҵра.
Итрадициатәу аҧсуа қыҭа Ҷлоу иалҵыз, уантәи збаҩхатәра ахы ыҵнахыз, анаҩс зҵарадырра Аҧсны анҭыҵ иаззырҳаз, еихазҳаз, ганрацәала еиларсу шәҟазара ҩашьара ақәым. Аҟыбаҩ ҷыда злоу рҿиаҩык иаҳасабала шәара шәцәырҵит иҳаҩсыз ашәышықәса 80-тәи ашықәсқәа инадыркны. Уи аахыс шәара шәрылахәуп Аҧсни, Урыстәылеи, егьырҭ аҳәаанырцәтәи атәылақәеи рҟны имҩаҧырго ацәыргақәҵақәа.
Шәара акыр шәазааҧсахьеит ҳтәыла акультуратә ҧсҭазаара, еиуеиҧшым амаҵураҭыҧқәа ныҟәыжәгахьеит - напхгара ашәҭон Аҧсны асахьаҭыхыҩцәа реидгыла, Аҧсны акультура аминистрс шәыҟан. Шәлагала рацәоуп ҳҵараиурҭа аҟазарақәа рыҟәша ашьақәгылараҿы, аханатәгьы ауниверситет аҟны асахьаҭыхратә ҟазара аус аиҿкааҩцәа шәарӷьажәҩаны шәрывагылан. Шәара шәнапхгарала ҳҵараиурҭаҿы ихацыркын "Аҧсны ҭагалантәи ашәыгақәа" ҳәа хьӡыс изауз, акыр шықәсагьы инеиҧынкыланы имҩаҧысуаз Жәларбжьаратәи арт-пленер. Иахьа акультуреи аҭҵаарадырреи рзы Аҧсны Ахада иабжьгаҩс шәыҟоуп.
Шәахьыҟазаалакгьы, аус ахьыжәуазаалакгьы еснагь иаашәырҧшуан апринципра, азанааҭ адырра, аҭакҧхықәра. Аха урҭ зегьы ирыцкуп ҩашьара зқәым шәбаҩхатәра. Шәырҿиара азхаҵара иаша аиухьеит ҳтәылаҿы еиҧш, анҭыҵгьы. 2007 шықәсазы "Аҧсны иреиӷьу асахьаҭыхҩы" ҳәа шәалкаан. Игәадуроуп шәырҿиамҭақәа Урыстәылеи, Америкеи, Англиеи, Иапониеи, Италиеи, Ҭырқәтәылеи уҳәа еиуеиҧшым атәылақәа рҟны ахатәы коллекциақәа ахьхадырҭәаауа.
Гәык-ҧсыкала ҳшәыдныҳәалоит! Ишәзеиӷьаҳшьоит агәабзиара, агәамч, арҿиаратә гәаҳәара, шәнапы злаку аусқәа рҟны ақәҿиарақәа! Аҧсуа иқәранҵыра ду Анцәа ишәаҭәеишьааит!
Ҽаанбзиала шәгәырӷьо шәнеилааит!
Ҳаҭырла,
Аҧснытәи аҳәынҭқарратә университет аректорат
Аҟазарақәа рыҟәша апрофессор-рҵаҩратә еилазаара
20.04.2021 ш.
- Нугзар Логәуа. Аҟазарҭа ⤵️