Йитг’атвылӈыма инэллэчг’ин крайик омакаӈ инэллэчг’ык Пенжинский муниципальный районык А. Болотновынак, меӈин галай Инэллэиччетык крайик, натанвэтгыӈнав’ яноткенав’ этгиӈо юнэтылг’ин районык.
Ӈывома йитг’атвылӈыгиӈын В. Солодов эвыӈ мальвыг’аёк яёг’ыӈнэн Пенжинский район. Чоччымав’ма лайвыгиӈэтыӈ натанвэтгыӈнав’ пыӈлов’, меӈию яноткенано келлаӈ ёнатылг’ыйикыӈ в’утин районык. Ымыӈ миӈкые накоев’лыӈвоӈнав’ пичгу то миӈкые валг’о этгиӈо аӄачыг’ычгиӈыкъет.
А. Болотнов эвыӈ, таг’этвэлай тыг’ыллыг’у COVID-19.
«Ӈынвычгая нэкутэйкыӈнэв’ вакцинацияв’, тит атг’ылӈывока аӄачыг’ыгиӈа. В’отэн г’ылойтыӈ наяванав’ 300 дозав’. То тит атг’ылӈывока аӄачыг’ычгиӈа, юнэтылг’у ыявак валг’ык в’уйвык ков’аӈлалаӈ, тит йикайтыӈ нэнг’ыенэв’ вакцинав’»,- эвыӈ инэллэчг’ын районык.
В. Солодов эвыӈ, Камчаткайтыӈ нэеннэв’ этг’у вакцинав’ 1200 дозав’.
«Ыннею вакцинав’ нэеннийӈынэв’ районный малав’ъяйтыӈ. Ынняӄ ыявайтыӈ в’ойвэтыӈ ыннею препаратав’ нэеенӈынэв’ мэллеӄэ. Мыев’ эняччыгиӈо келлаӈ гыйипык вакцинав’. Йитг’атвылӈыма омакаӈ министранак энанмалав’гиӈэпыӈ РФ М. Мурашко, мытвэтгыльг’анмык, тит Камчаткайтыӈ нэнг’ыенэв’ препарато, меӈию эмэлкэ йив’лык, ӈэвэӄ келлаӈ +2 +8 градусав’. Титэ нэеенӈын препарат, вэтга наяӈвоӈнав’ вакцинацияв’ ыявак валг’ык в’уйвык Пенжинский районык»,-иви В. Солодов.
22 тэнмыталойиг’илгыӈӄо 1 ӄоягыёлг’атйиг’элгэтыӈ Камчаткайтыӈ нэеннэв’ 4700 дозав’ вакцинан «Спутник-V” («Гам-КОВИД-Вак»). Ӈэвэӄ экмитык ватӄыльг’энав’ 10 г’ылв’ыёв’ краетыӈ нэеннэв’ 5900 дозав’. Камчаткайтыӈ наӈвонав’ етык вакцинан льгичейпыйиг’элгыӈӄо 2020 гэвэгиӈык. В’отэн г’ылойтыӈ ымыльг’ыӈ Камчаткайтыӈ нэеннэв’ мыкыӈ 16 тысячав’ дозав’.
В’уткекъйит панэнатвылай эначгыпавылг’о инэллэчг’ин то Эналлаэччатыӈӄо крайик.
Эчгыпо йинчоччымав’нэн С. Тынанто.