Кочаймав’лаӈ йиг’илгу, титэ коӈволаӈволаӈ кангатгиӈо. Яёг’ыӈма такыёв’ инэллэчг’ин крайик, накончоччымав’ӈынав’ амалваӈ валг’о вэтгиӈо.
«Мучгинэв’ яноткенав’ танвэтгыӈгиӈо келлаӈ- тит 2021 гэвэгиӈык еӄӄым экэнгэткэ ныг’иннэв’ мучгинэв’ умкылв’ыно. Эчги мытколыг’оӈвоӈнав’ ӈыволг’о ӈылатгиӈо гычголаӈӄо космический гитэнэӈэ. Ынняӄ, ниччыг’эв’ ёг’ык ыявак валг’о айгытӄыкенав’ районо, ыявайтыӈ мыткунӈивыӈнэв’ техникав’, мыткекмылтанӈыволаӈ вэтга ӈывок йинв’айӈатык кангатгиӈо, то ӈынвыӄ пылв’ынто мыткояваӈвоӈнав’»,- эвыӈ инингив’ инэллэчг’ин Инэллэиччетык крайик Р. Василевский.- В’уткекъйит мыткоятайкылаӈнат ваныт гычголаӈӄо гитэк умкылв’ыно айгытӄыӈӄал Камчаткак. Ваныт итикынэт- в’уйвык Тэличчан то Кольпач, в’утку келлаӈ вагалыно, то ӄуччев’ ею ныг’итикынэв’ чаӈмикчиӈык вертолётав’. Омакаӈ авиаиччетык мытвэтгыльг’алла, тит алак ычгинэв’ вертолётав’ нэйиӈэйкынэв’ айгытӄэтыӈ, тит ӈанко навэтатэкынав’, титэ кенӈыволаӈ кангатгиӈо».
Галалг’ы вэтатвытгыйик иччет Эналлаэччатыӈӄо крайик омакаӈ Р. Василевский йитг’атвылӈылай омакаӈ инэллэчг’ык федеральный эччатыӈӄо.
«Рослесхозык натанвэтгыӈын пыӈыл йинтоӈвавык авивано крайик. Ыннею вэтгиӈо нэкутэйкыӈнэв’ муйик майӈынутэк: ӄинам, Сибирский федеральный округык нымэлг’эв’ ковэталаӈ ынниг’ан валг’о иччету йиӈэльг’этылг’ин.
Мычатанвэтгыӈлайкэ, тит ныг’итикынэв’ федеральный пылв’ынтыв’эннятгиӈо, меӈинэтэ мычейкуйӈынэв’ явэнаӈо, то тит йинтоӈвавык вагалыно.
Мойкыӈ кытаван ныг’итикынэв’ ымыӈ ею, тит йинв’айӈатык ӈылатгиӈо, эчги мытынчоччымав’нав’ тэнмо, тит нанг’акмеламык федеральный тайкыёлӄылэтыӈ»,- иви Р. Василевский.
Галалг’ыомакальг’атгиӈык, миӈки пыӈлов’ ЧС накогэтаӈвоӈнав’ инэллэчг’э крайик В. Солодовынак йилнин тайкыёв’ эналлачг’ыйикыӈ муниципальный иччетылв’ынык, тит ычгынан чинин нэнг’ынчичг’эннэв’ чоччымав’гиӈо титэ коӈвоӈволаӈ ӈылатгиӈо умкылв’ынин.
В’отэныӈӄо панэнатвылай эначгыпав’ъэччатыӈӄо инэллэчг’ин то Эналлаэччатыӈӄо крайик.
Эначгыпавэ С. Тынанто.