Камчаткак пылиткуй профессиональный ячвыӈчатгиӈын «Ынанмитычг’ын инэнгыюлэвылг’ын ОБЖ» то ынанмитычг’ын инэнгыюлэвылг’ын БЖД». В’утин ячвыӈчатгиӈык эллай инэнгыюлэвылг’у гамга в’ойвыӈӄо, ымыӈ ыяваӈӄо.
Эналватылг’о нэлӈыгэг’ын инэнгыюлэвылг’ын ОБЖ МКОУ «Поӄачакэн калэян» Олюторский районыӈӄо А. Якушев. Галама омакальг’атгиӈын ванык, миӈки ковэталаӈ йинв’айӈатылг’о кангатгиӈо Петропавловскак- Камчаткакен, ынкыӈ нэйилнэв’ дипломо, то ӄавэёв’.
Анатолий городэтыӈ етти омакаӈ ейгучев’ӈылг’ык, меӈию яллай ячвыӈчатгиӈэтыӈ ӄаплиткук. Калэйтылг’ыйикыӈ нэтэйкын энангыеватгиӈын ваныӈӄо, миӈки ковэталаӈ йинв’айӈатылг’о кангатгиӈо.
Итылг’у иччетык жюри эв’лай, йигыёлав’гиӈо лиги лыӈык ОБЖ келлаӈ яноткенано, тит калэйтылг’а лиги нэнг’ылӈикынэв’ ольвыльг’атгиӈо вэтанма, тит намитытвайкынав’ янг’ав’ итык, ӈэвэӄ кыг’ояв’ӈыволаӈ аӄаэтгиӈо. Ыннею яйгочав’ӈыгиӈо кытаван нэнг’экмитикынэв’ гамгакымиӈа. В’утин йигыёлав’гиӈа кымиӈыйик лиги накоӈвоӈнав’ чининкинэв’ кытгэмо, миӈкые валг’о аӄаэтгиӈо котваӈволаӈ. Миӈкые наконгыёлав’ӈывоӈнав’ кымиӈу- кувыччетын метгиӈын вэтатык инэнгыюлэвылг’ин.
Энантоӈвавылг’о ячвыӈчатгиӈын ныг’эли Министерстван энангыёлав’гиӈэпыӈ омакаӈ иччетык МЧС Россиякэн итылг’ын Камчаткак.
В’уткекъйит панэнатвылай эначгыпав’ъэччатыӈӄо ГУ МЧС Камчатский крайик.
Эначгыпавэ С. Тынанто.