В’уйвык Палана итти иччет тайкыёлӄылэн «Калэйилӈылг’эн то краеведениякен иччет ыявак валг’этыӈ районэтыӈ».
В’уччин иччет китыӈ - культуракен энанъеёлав’гиӈэн тайкыён, меӈин гантоӈвав’лэн Библиотекакен иччетылв’ынэ, меӈиныйик накояваӈнав’ пылв’ынто грантыӈӄо Президентан РФ, меӈию келлаӈ тит йингычголавык этгиӈо ваятэн.
«Яноткэн этгиӈын китыӈ, тит ыяваӈӄал итылг’ык районык опта лиги нэнг’ылӈикынэв’ культуракенав’ пыттоӈо. Майӈыиччетэ омакаӈ калимитычг’ык, вэтатылг’ык культурак мыткотайкыӈвоӈнав’ нэӈиньмыӄинэв’ йитг’атвылӈыгиӈо ёнатылг’ыйикын Айгытӄыӈӄал. Мыткоёг’ыӈвоӈнав’ калэяв’, мыткотайкыӈвоӈнав’ ангыто ӈайӈынок. Эмет мытэлла Усть- Камчатскак, Соболевский, Мильковский районык, то маляйгывэ мыткымг’ылэла Паланыӈӄо. В’утин иччетык эллай калимитычг’у, краеведав’, вэтатылг’о библиотекак то театраӈӄо г’элючин.
Ёнатылг’ыйикыӈ Паланык нэтэйкынэв’ имы миӈкые валг’о нэӈиньмыӄинэв’ йитг’атвылӈыгиӈо»,-панэнатвэ Е. Самсонова, мэйӈычг’ын библиотекарь КГБУ ККНБ С.П. Крашенинниковын.
Чав’чывагынункэн библиотекак нынылг’этылг’ын Кецайин Кеккетинын галай йитг’атвылӈыгиӈын «Калимитычг’у Паланкэнав’ каличитылг’ин вагиӈык крайик», в’утку лыг’овылӈылай инэллэчг’ын Камчатский иччетин калимитычг’ин Союзык каличитычг’ин Россияк А. Смышляев, итылг’ын поэто В. Татауров то инэллэчг’ын тайкыёлӄылэн Е. Самсонова. В’утку нэйилын ӄавэёчгын ӈыволг’ыӈ каличитык Паланыӈӄо К. Косыгинынаӈ, ынно ныг’эли эналватылг’о ячвыӈчатгиӈык «Айгытӄыкен лымӈыль. В’утку то эчги». Нутэнутэ, меӈинэтэ йинг’уевэннин поэто Ю. Алотов, А. Власов то калимитычг’ын В. Косыгин (Коянто), амъел кунмэйӈэв’ӈынин митычг’у каличитык.
Ӈэӈиньмыг’эв’ наполмтэлын ӄычг’этылг’э панэнатвыгиӈын «С. П. Крашенинников- ынан митычг’ын инэйгулэтычг’ын Камчаткан», меӈин йиллэнин вэтатылг’а краевой библиотекак Н. Дивнина.
Таӄалг’о храмык кетог’ык Аӈаӈылг’ын Николай Чудотворец йитг’атвылӈылай поэтык В.Татауров. Ычгынан нийгулэтын миӈкые ынно кукаличитыӈ, миӈкые валг’ын в’ины ёнатгиӈэпыӈ, ымыӈ панэнатвыкъет, меӈию кокалэӈвоӈнэн.
Итылг’у культурыный иччетык эняячелай лигилыӈылг’ынаӈ скульптор В. Крупина, нэгитэлӄивын музей яйичг’эн Хелол, наёг’ын кымиӈычгин иччет «Беркут».
Ыччу опта йиголатвылӈылай чинин ӈыволг’ык каличитык, ячвыӈчатылг’ык г’ытг’ылг’ин меӈию айӈон эллай эналватылг’о.
Тыттель эӈиньму нэлӈын репетициян мылав’ъиччетык «Ангт», ычгынан нэнгыйивэннэв’ энанмэтытватгиӈо мылавык.
Калэйтылг’ыйикыӈ Е. Самсоноаынак то Н. Дивнинынак нэнгыйивэннэв’ «Кутхан то пипиӄыльӈу», «Камчаткак коёналаӈ амалваӈ валг’о ваято», «Ымнутэнут айгытӄыкымиӈычгин». Пылитколг’ыйкыӈ калэян нэтэйкын панэнатвыӈ «Миӈки ейгучев’ӈык Камчаткак» меӈин йиллэнин вэтатылг’а ТИНРО В. Шарахматовынак. Ынан ыпполёчг’ыӈ нэнгыйивэннэв’ г’элючин эналлама спектаклё «Юнэтилг’ын Фип», «Кошканын яяӈа», «Номӄэн Айгытӄын». Ӈынвыӄ ею нэӈиньмыӄинэв’ нэйгулэнэв’ кошкакьет. Нэӈиньмыӄин лайвыгиӈын итти Паланэтыӈ. Актыка ӄонпыӈ ёг’ык ыявак валг’о в’уйву, в’отэныӈӄо ынниг’ан валг’о иччету конг’алаӈ ангыто»,- иви Е. Самсонова.
Опта лэйвылг’э накакменӈывоӈнав’ ныпыттоӈӄэнав’ материало йитг’атвылӈыӈӄо. Ватӄэнав’ йитг’атвылӈыгиӈо накончоччымав’ӈынав’ Карагинский районык. В’отэныӈӄо панэнатвылай эначгыпав’ъэччатыӈӄо инэллэчг’ин то Эналлаэччатыӈӄо крайик.
Эняннимэв’нэн С. Тынанто.