Лайвыма Оссорайтыӈ инэллэчг’ын крайик в’аняватэ, миӈкые явэталайкэ, тит амъел йингычголавык этгиӈо майӈы лыӄлэӈ галалг’эн фестивален,
Инэллэчг’э Камчаткак анъянэн г’ытг’ылг’у, меӈиныйик нагалан ниччыӄин в’ины то нымэлг’эв’ нэплиткун ячвыӈчатгиӈын. Ынно иви, Камчаткаӈ ыннин китыӈ нымейиӈӄин этгиӈын. Пылиткома в’аняватык, ынан тывынэн миӈкые амъел наяныплэпавэкэ берингиякенав’ ячвыӈчатгиӈо.
«В’утин гивик мытлыг’олан, ячвыӈчатгиӈын «Берингиян»- ынан митг’айин то нэӈиньмыӄин Камчатканэн. Ымыӈ галалг’о ячвыӈчатгиӈо фестивалик: «Дюлин», муниципальный энангыеватгиӈо «Г’ылг’ылкин в’ины», «Елизовский спринт»-нэкункетгув’ӈын яноткен ячвыӈчатгиӈын. Омакаӈ амъел мыччавэталлайкэ тит амъел йингычголавык «Берингиян». Янотыӈ мынг’ыяйтаӈлайкэ то мынг’ыныплэпав’лайкэ айгытӄыкэн ячвыӈчатгиӈын, намкумг’ыг’ав’ мынг’ыгэталайкэ йинымкавылг’о вэтгиӈо. Нымейӈӄин ӄайлём тыкив’ӈын А. Печенинаӈ, меӈинынэк в’утин гивик йинлыг’уӈэв’нин культуракэнав’ этгиӈо тайкыёлӄылэн «Берингиян-лыг’овылӈатиӈын Айгытӄыкэн». Амъел нытвайкэ в’уччин тайкыёлӄыл. То амъел мыччавэталлайкэ культурный этгиӈэпыӈ, то концертакэнак йингыеватгиг’эпыӈ»,- иви В. Солодов.
Инэллэчг’э крайик йилнин тайкыён эналлачг’ыӈ культурак крайик О. Прокопенко ӈывок в’отэныӈӄо ӄонпыӈ вэтатык.
В. Солодов эвыӈ, ӄутин гивик йитики янъя валг’ын ячвыӈчатгиӈын, миӈкые нэег’эйӈэв’ӈынэв’ тумнутэкинэв’ экспертав’ то ячвыӈылг’о.
Инэллэчг’э тывынэн, миӈкые валг’о пылв’ынтыв’эннятгиӈо ныг’итикынэв’, то йинчоччымав’ниӈо ячвыӈчатгиӈэтыӈ г’ытг’ылг’ин. Опта йилнин тайкыён эналлачг’ыӈ спортакэн крайик. В’утин гивик ӈынвычгаё эллай кымиӈычгин ячвыӈык г’ытг’ылг’ин «Дюлин». Инэллэчг’ын эвыӈ, тит ыннею яввыӈчатгиӈо яӈъя итылг’у ныг’ынг’элнэв’. Кымеӈыячвыӈчанма, ынниг’ан валг’о этгиӈо ягалалаӈ гамгарайонык. В’отэныӈӄо опта яӈволаӈ ячвыӈчатытык ыявак валг’ыӈӄо нымъёлгыӈӄо.
Яӈъя тывынэн инэллэчг’э крайик яйтаӈгиӈо чининваяткэнав’ этгиӈо. В’утин гивик пылв’ынтыойпакметгиӈо этгиӈык «Яйтаӈгиӈо то йингычголав’гиӈо культуран Айгытӄын» нанымкавын ӈыёчаӈ. Ыннею вэтгиӈо келлаӈ ӄонпыӈ тэйкылг’у инэллэчг’э крайик.
«2021 гэвэгиӈык мыччаӈвоӈнав’ в’иннетык митычг’у ченекечг’энаӈ тэминӈык,в’аӈэк. Тыттэль тыкаӈъяӈнав’ г’ытг’ылг’у- тую ныкетгутую г’уемтэв’илг’ытую, овэкэӈ ныв’иннеттую, эӈг’элу колӈылаӈыткы тучгинэв’ тумгу- г’ытг’у. Тучгинэв’ гыматгиӈо ячвыӈчанма янотык эӈиньму ымыӈ микнэк нэкулӈыӈнэв’.
Янъя нымэйиӈӄин ӄайлём, тыкив’ӈынэв’ в’эннятычг’ыйикыӈ пылв’ынта. Ыччу в’эннялай, тит нымэлг’эв’ нагалан «Берингиян»,- эвыӈ В. Солодов.
Ымоӈ ӄуччев’ в’иннетычг’у йинчоччымавык «Берингиян» опта тывынэн то аӈъянэн.
Эчгыпо йинчоччымав’нэн С. Тынанто.