Чоччымав’ма эӄэвык, инэллэчг’ын В. Солодов йитг’этвылӈэти омакаӈ айгытӄываятык, меӈию еллаӈ майӈыумекетык.
Камчаткаӈӄо ёмакальг’аллаӈ 21 тыӈивылг’у, меӈию келлаӈ 4 айгытӄываятэн иччетык.
«Гымкыӈ китыӈ четкеюӈу тит омакаӈ вэтатык. Инмы ӄонпыӈ лиги мытколӈыӈвоӈнав’ этгиӈо айгытӄываятыкъет. Точгынан опта котайкыӈволаӈыткы нымэйиӈӄин вэтгиӈын, тит яйтаӈык чининваяткенав’ ёнатгиӈо, вэтгиӈо то культуракенав’ пыттоӈо»,- эвыӈ В. Солодов,ӈывома йитг’атвылӈыгиӈын.
Йитг’атвылӈыма натанвэтгыӈнав’ пыӈлов’ ӄояв’ъепгиӈыкъет, ёнатгиӈыкъет в’уйвыпиляӄык, петыяякъет то ӄуччев’.
Опта нэгитэн пыӈыл миӈкые валг’ын нытуйӄин тайкыён г’уеви Федеральный агенствакен ынныӈийтыкъет, миӈки накотвыӈнав’ этгиӈо тит экмитык ынныгиӈо 3 ӄоягыёлг’атйиг’элгыӈӄо.
«Эчги г’ояв’лай аӄайпыгиӈо, мыев’ ӈывой вэтатык нытуйӄин регламент калик в’аӈлагиӈо ынныӈийтык айгытӄываята, меӈию паненячг’энаӈ в’аӈлагиӈо накалинав’- ӄыйим г’ынйиликынэв’ квотав’. То нэегитэйкынэв’ опта- миӈки коёналаӈ айгытӄылг’у. Гымнан ыннею пыӈлов’ тыятанвэтгыӈнав’ федеральный Эналлаэччатыӈӄо. Тыкивыӈ, аму мыччаӄаййиныплэпав’ӈынав’ ыннею пыӈлов’»,-эвыӈ В. Солодов.
Инэллэчг’ын Камчаткакен эвыӈ, пылиткома майӈыумэкэт айгытӄываятэн, гымлэӈ йитг’этвылӈэтык, тит амъел танвэтгыӈкы ымыӈ ею айгытӄываятыкъет.
4-8 гыёлг’атйиг’илгык 2021 гэвэгиӈык Салехардык ягалаӈ майӈыумекет Иччетин ӄайваятэн юнэтылг’ин Айгытӄыӈӄал, Сибирик то Дальний Востокык РФ. В’утку нэегитэӈнэв’ то наятвыӈнав’ вэтгиӈо: чиниваяткен вэтататгиӈыкъет, яйтаӈгиӈо культуран, миӈкые валг’о этгиӈо келлаӈ энангыёлав’гиӈэпыӈ чененйеличг’энан, социальный этгиӈо. В’утин съездак еллаӈ мыкыӈ 250 тыӈивылг’у омакатгиӈэтыӈ, вэтатылг’о Государственный Инэллэиччетык гамга регионыӈӄо ымыӈ итылг’у вийиӈычг’у айгытӄываятэн РФ, то инэнгыюлэвылг’у яйгочав’ӈыэччатыӈӄо.
В’уткекъйит панэнатвылай эначгыпав’ъэччатыӈӄо инэллэчг’ин то Инэллэиччетин крайик.
Эначгыпавэ С. Тынанто.