Мәскеу қаласындағы Үлкен театрда Елена Север мен Андрей Малахов жүргізген «BraVo» халықаралық кәсіби саз байқауында бірқатар номинация иелерінің арасында Шымкент қалалық Опера және балет театрының директоры Майра Мұхамедқызының да есімі аталды. Бірақ, өкінішке қарай, ол «Үздік опера әншісі», «Үздік классикалық орындаушы» жүлдесін жеңіп алған жоқ – бұл шындыққа жанаспайтын жалған ақпарат. Өйткені, бұл байқауда ондай номинация мүлдем болған жоқ. "Үздік классикалық әйел вокалы" номинациясын сопрано Альбина Шагимұратова жеңіп алса, "Әлем жұлдызы" номинациясын – Пласидо Доминго, "Жыл жаңалығы" номинациясын – Үлкен театрдың жастар тобының солисі Мария Баракова иеленді. Майра Мұхамедқызы бар-жоғы "Әріптес елдің ең танымал классикалық орындаушысы" номинациясына қол жеткізді. "Танымал" мен "үздіктің" айырмасы жер мен көктей екенін түсінетін шығарсыздар! Оның үстіне, номинация жүлдесін әншіге әлемдік деңгейдегі жұлдыздар, аты аңызға айналған опера орындаушылары емес, Қазақстанның Ресейдегі Елшілігінің кеңесшісі (Елшісі де емес) Еділ Хозеұлы тапсырды.
Менің таң қалғаным, Майраны Шымкентке жеке басының мүддесімен жүрсін деп емес, үшінші мегаполистің мәдениетін әлемдік деңгейге көтерсін деп шақырған сияқты еді. Мәселен, өзі аса мақтап жіберген "Домалақ ана" операсын сол байқауға неге апармады екен? Әлде апарды ма? Апарса, "Жыл операсы" номинациясы Майраның операсына емес, Үлкен театрдың "Садко" операсына берілгені қайран қалдырады. Жалғандықпен жарқырап жүре бере ме екен "жұлдызымыз"? "Я еще покажу" дегені қайда қалды?..
© Әсет Әссанди,
театртанушы.