Республика халыҡ ижады үҙәгенең Мәҙәниәт һарайында 2015 йылдан алып “Селтәр” башҡорт милли кейеме студияһы эшләп килгәнен күптәр белә. Унда шөғөлләнгән апайҙар янына башҡорт ҡатындарының иҫ киткес зауыҡлы, затлы кейемен тегергә, биҙәүестәрен эшләп ҡарарға теләге булған яңы ағзалар ҙа өҫтәлә.
“Беҙҙең төп бурысыбыҙ – милли кейемебеҙҙең тарихи өлгөһөн тергеҙеп, һаҡлап, йәштәргә уның дөрөҫ өлгөләрен күрһәтеү, өйрәтеү, – ти Фатима апай Хәйретдинова, “Селтәр”ҙең етәксеһе. – Йәштәребеҙҙең милли кейемгә ылыҡҡаны, матур итеп биҙәүестәр тағып йөрөргә ынтылғаны ҡыуандыра. Бер нәмәгә генә иғибарҙы йәлеп итер инек: хазиналарыбыҙ өлгөләрен нисек тура килде, шулай итеп түгел, ә нисек булырға тейеш, шул ҡағиҙәләргә таянып эшләү үтә лә мөһим. Беҙҙең милли кейемдә һәр нәмәнең үҙ төҫө, үҙ рәүеше, йәғни формаһы бар. Һәр деталь нимәнелер аңлата, уға тәрән, сакраль мәғәнә һалынған”.
Сираттағы оҫталыҡ дәресендә Ғәбиҙә апай Вәлиева сигелгән ашъяулыҡ өлгөһөн күрһәтте. Замансалаштырылған ИҘЕҮ (селтәр) – кейем өҫтөнән таға торған, күкрәкте ҡаплап торған биҙәүес – эшләү дәресе һәммәһенең күңеленә хуш килде. Студияның күптәнге ағзаһы Альбина апай Исхаҡова йыйылғандарға румын макрамеһы техникаһында ырғаҡ менән иҙеү эшләү оҫталығы буйынса һабаҡ бирҙе. Иләнгән ептәрҙән эшләнгәнгә күрә, бик еңел, нәзәкәтле булған был биҙәүес йәштәргә ла бик килешле.
Шулай айырым бер дәрт, ихласлыҡ менән туған халҡыбыҙҙың рухи мәҙәниәтен һаҡлауға хеҙмәт иткән “Селтәр”ҙәргә “афарин”дан башҡа һүҙ юҡ!
Рәүилә Ғатауллина.
Айрат Нурмөхәмәтов фотолары.
Сайтта сыҡҡан бар яҙмаларҙы ошо һылтанма буйынса инеп уҡый алаһығыҙ: https://bash.rbsmi.ru/