“Ҡаным берәйһенә ковидты еңергә ярҙам итһен”. Был – коронавирус менән оҙаҡ һәм ҡаты ауырып, һауыҡҡандан һуң кешеләргә ярҙам йөҙөнән донор булған ирекмәндең һүҙҙәре.
“Берҙәм Рәсәй”ҙең “Беҙҙең хәстәрлек” проекты ирекмәне Виктория Степаненко 2011 йылдан алып ҡан тапшыра. Ҡатын “Башҡортостандың почетлы доноры” исеменә лайыҡ.
Үткән йыл Виктория коронавирус инфекцияһын ауыр кисереп үткәргән. Оҙаҡ ауырып, һаулығын ныҡлап яҡшыртып алғансы ла байтаҡ ваҡыт үткән. Һауыҡҡас, шундай уҡ хәлдә ҡалған кешеләргә ярҙам итергә тейешмен, тип хәл итә ул.
Ә бөгөн Виктория Республика ҡан ҡойоу станцияһында өсөнсө тапҡыр ковидҡа ҡаршы плазма тапшырған.
“Һәр ҡан тапшырғандан һуң күңел күтәренкелеге, көс өҫтәлеүен тоям. Минең ҡаным кемгәлер ауырыуҙы еңергә ярҙам итер, тип өмөтләнәм. Беҙ бит иртәгә кемгә ярҙам кәрәгерен белмәйбеҙ, улар араһында берәй яҡының булырға ла мөмкин. Форсатың барҙа кешеләргә ярҙам итергә кәрәк”, – ти Виктория.
Республика ҡан ҡойоу станцияһының донорлыҡты пропагандалау буйынса менеджеры Светлана Әсәҙуллина һүҙҙәренә ҡарағанда, бер кешенән алған плазма күләме – 600 мл – өскә бүленә. Был - бер кеше ауыр сирләгән өсәүгә ярҙам итә ала тигән һүҙ.
“Пандемия сигенмәй әле. Ҡан плазмаһының ковидҡа ҡаршы компоненттарына ихтыяж ҙур. Әле беҙ Өфө моторҙар эшләү берекмәһе менән хеҙмәттәшлек итәбеҙ, унда ковидты үткәргән донорҙар күп. Башҡа ойошмалар ҙа бәйләнешкә сыға. Кешеләрҙең ихлас күңелдән башҡаларға ярҙам итергә тырышҡаны ҡыуандыра”, – ти Светлана Әсәҙуллина.
Автор: Равиля Гатауллина
Присоединяйтесь к обсуждению новости в наших группах: Вконтакте , Одноклассники , Facebook .