Башҡортостандың атҡаҙанған артисы Марсель Ҡотоев яҙ бүләге итеп “Туҡтасы ваҡыт...” тип аталған матур концертын тәҡдим итә. Мәғлүм булыуынса, әле “Башҡортостан” дәүләт концерт залында 26 март киске сәғәт 7-лә үтәсәк сараға билеттар һәйбәт һатыла.
Концертта уның ижадташ дуҫтары Рөстәм Шаһыбалов, Тимур Рамазанов, Зилиә Бәхтиева, Алина Дәүләтханова, Башҡортостан милли симфоник оркестры, “Премьер” вокал төркөмө, “Йатаған” этно төркөмө, “Бишбармаҡ” оркестры, “Аманат” халыҡ бейеүҙәре ансамбле, Илнур Һибәтуллин, Нух, Фәрүәз, Вилдан Ҡотоевтар ҡатнашасаҡ.
Марсель Ҡотоев Баймаҡ районындағы данлыҡлы Буранбай сәсән ауылы Буранбайҙа тыуған. Туғыҙ класты тамамлағас, Өфө сәнғәт училищеһының ҡурай бүлегенә уҡырға инә. Унан һуң Сибай филиалының вокалсылар класын тамамлай, 2006 йылда Башҡорт дәүләт филармонияһына эшкә урынлаша. Әле “Башҡортостан” дәүләт концерт залында хеҙмәт юлын дауам итә.
Йырсы “Ирәндек моңдары” төбәк-ара бәйгелә балалар араһында – беренсе урын, үҙешмәкәрҙәр араһында – дипломант, профессионалдар араһында Гран-при яулаған. “Урал моңо-2006” халыҡ-ара конкурсында беренсе урынға, “Урал моңо-2014”-тә Гран-приға лайыҡ була. Ул - төрлө сит илдәрҙә, мәҫәлән, Ҡаҙағстанда, Ҡырғыҙстанда, Украинала, Төркиәлә Башҡортостаныбыҙҙы танытып, данын күтәреп сығыш яһаған йырсы.
Әйтергә кәрәк, Марсель Ҡотоевтың был концертын ойоштороуҙың бер сере лә бар, уны тамашаға килгәс белерһегеҙ.
Автор: Рәмилә Мусина
Присоединяйтесь к обсуждению новости в наших группах: Вконтакте , Одноклассники , Facebook .