Оссорак галай йинойпакметгиӈын г’ытг’ылг’ин «Берингиян-2021». Этгиӈык «Аӈг’алгиӈын Айгытӄыӈ» ойпакмето накойилӈывоӈнав’ г’ытг’ылг’ыӈ, меӈиныйик ячвыӈма наяванав’ чининкинэв’ уттыуетикив’. Яноткен ойпакмет-1 миллион пылв’ынто- экминин А. Притчинынак.
«Тыкопоздравлянӈын гымнин тумгытум А. Притчин. 30 гэвэгиӈо явалэтыӈ Андрей иччетык В. А. Бочариковынак итти в’иннетычг’у ячвыӈчатылг’эн Ӄараӈыныӈӄо Ильпыретыӈ. 1994 г. ынан еннин иччет Карагинский районыӈӄо Авачинский ячвыӈчатгиӈэтыӈ. Ятан 2002 гэвэгиӈык экминин ыннив’ин г’ытг’у ячвыӈчатгиӈэтыӈ то ныг’эли эналватылг’о. В’отэныӈӄо ӄонпыӈ коячвыӈчанӈывоӈ. В’уччин ячвыӈчатгиӈын китын 19, то ынно ымыӈ микнэк лиги нэкулӈыӈын»,- эвыӈ А. Печень, энантоӈвавылг’ын ячвыӈчатгиӈэн г’ытг’ылг’ин «Берингия».
Ӈыеӄэв’кину в’утин номинацияк то ойпакметгиӈын 700 тысячав’ пылв’ынто экминин А. Поповынак. Ӈыёӄав’кэн ваны ныг’эли Н. Левковскийин, ынкыӈ нэйилын пылв’ынтыкалитг’ул 500 тысячав’ пылв’ынтылг’ын.
Ымоӈ г’ытг’ылг’ыйикыӈ, меӈиныйик нагалан йиг’эт уттыуетикэтэ нанойпакменнав’ номинацияк «Яйтаӈык то йинымкавык Айгытӄыкенав’ пыттоӈо». Дипломо то пылв’ынтыкалив’ 150 тысячав’ пылв’ыттылг’о нэйилнэв’ Г. Айначгинынаӈ, Е. Кутынкававынаӈ, Н. Левковскийинаӈ, А. Поповынаӈ то А. Притчинынаӈ.
Этгиӈыкъет «Ченекечг’энаӈ кимитг’алг’у» нэкминэв’ ойпакмето ӈанэныйик, меӈиныйик нагалаӈ ячвыӈчатгиӈын чининкимитг’ата. Пылв’ынтыкалитг’улу 150 тысячав’ пылв’ынтылг’о нэйилнэв’ Г. Айначгинынаӈ то А. Притчинынаӈ.
«Берингиян-2021» наӈвон Эссок 28 чиӄъивив’ъйиг’илгык. В’ины ячвыӈылг’эн итти Эссоӈӄо Оссорайтыӈ то ынин эв’лыгиӈын итти 950 километрав’. Янот ӈыволай ячвыӈчатгиӈын 13 г’ытг’ылг’у. То паёчалай 8 г’ытг’ылг’у меӈию пыкейляй пылитконвэтыӈ ячвыӈчатгиӈын.
Эчгыпо йинчоччымав’нэн С. Тынанто.