Ойпакмето янотычг’ыйикыӈ то ячвыӈчатылг’ыйикыӈ «Берингиян-2021” йилнин инэллэчг’э крайик В. Солодовынак.
Янотыӈ галанэн йиг’эт 950 километрав’ А. Семашкинынак. Ынно ныг’эли эналватылг’о ячвыӈчатгиӈык 2021 гэвэгиӈык. Ӈыеӄэв’кину ныг’эли В. Демченко, ӈыеӄав’кено-В. Левковский.
В. Солодовынак аӈъянэн г’ытг’ылг’у ячвыӈчатгиӈыкъет, то юнэтылг’у крайик то ямкичилг’у эӈъэлыкъйит лыӄлэӈинаӈ ячвыӈчатгиӈыӈ.
«Ӄайлём, тумгытую, эӈг’элу лыӈылг’ытую г’ытг’ылг’у, юнэтылг’у Оссорак, юнэтылг’у Камчатский крайик. Ангыт галай метг’аӈ, г’ытг’ылг’ыйикыӈ нэйилнэв’ ойпакмето. Котвалаӈ ӈынвыӄ тэнмо,тит йингычголавык «Берингиян». Мыткоег’анӈыволаӈ гитэк тучгинэв’ нымэлӄинэв’ этгиӈо ячвыӈчатыкъет. Мыткев’лаӈ- ӄонпыӈ ныюнэтики «Берингиян» то ныкетгутвийки. Ымоӈ тыкопоздравлянӈынав’ ангытыкъет, то тыкивыӈ, пылиткуй ячвыӈчатгиӈын г’ытг’ылг’ин «Берингиян- 2021»,- эвыӈ В. Солодов. Пылиткома в’аняватык инэллэчг’э Камчаткак эпынэн янотг’ытг’ыӈ А. Семашкинын, меӈин наколӈыӈвоӈын Арго, г’энныягэӈын. Опта йинойпакменнэн ымоӈ ячвыӈчатылг’о г’ытг’ылг’у, меӈию пыкейляй пылитконвэтыӈ ячвыӈ.
Акметгиӈо «Берингиякенав’-2021»:
1 ваны - Андрей Семашкин;
2 ваны - Вячеслав Демченко;
3 ваны - Валентин Левковский;
4 ваны - Андрей Притчин;
5 ваны - Алексей Попов;
6 ваны - Николай Левковский;
7 ваны - Евгений Кутынкавав;
8 ваны - Герман Айначгин.
Ячвыӈчатгиӈын г’ытг’ылг’ин «Берингиян-2021» ӈывой Эссок 28 чиӄъивив’ъйиг’илгык. Янот эллай 13 ячвыӈчатылг’о г’ытг’ылг’у. 15 тэнмыталойиг’илгык Оссорайтыӈ пыкейляй 8 г’ытг’ылг’у, меӈиныйик нагалан ымыльг’ын йиг’эт 950 километрав’.
Эчгыпо йинчоччымав’нэн С. Тынанто.