Инэллэчг’у гамга ынныӈийтылг’ыэччатыӈӄо амъел ковэталаӈ тит йинчоччымавык тэнмо йиплэпавык вэтгиӈо.
Омакальг’анма Г. Зверевынак, инэллэчг’э вэтатъэччатыӈӄо йинг’уевэннин йинчоччымавылг’ын документан кытаван 2035 гэвэгиӈэтыӈ. В’утку келлаӈ яноткенав’ яёг’ыӈгиӈо: йингычголав’гиӈо аӈӄатайныкенав’ ынныӈийтыгиӈо, йинтойтыватгиӈо ынныӈийтыкинэв’ майӈыг’ытву, то йиплэпав’гиӈо нывилвано, ымыӈ йингычголавык энанвэлитков’гиӈо ынныпичгин ымнутэк. Ыннею тайкыёв’ эмет накояёг’ыӈнав’ 2025 гэвэгиӈык. 2035 гэвэгиӈэтыӈ гамгаг’оямтав’элг’ыӈ ныг’итикынэв’ 32 йиллиту ыннин ёлг’ыёв’, йингычголавык вэлатгиӈо майӈыынӈийтыиччетылв’ынин ӈыёчаӈ, йинымкавык ямкичилг’у томнотаӈӄо, меӈию янныӈэйтылайкэ- 6000 г’уемтэв’илг’у сезонык. Яёг’ыӈгиӈык келлаӈ яноткенав’ тайкыёв’- йингычголавык ёнатгиӈо аӈӄатайнык валг’ык нымъёлгык в’эннятгиӈа ынныӈийтыиччетэ социально- экономический этгиӈэпыӈ.
«Яноткенак умекетык, меӈин галай кытэплёйиг’илгык, эллай эччыгиӈо. Тит ымыӈ аӄайпыгиӈо элэк йиччык, ӈынвыӄ вэталлай. Эчгикин йитг’атвылӈыгиӈын итти тит пылиткук тайкыён йиплэпавык ынныӈийтыгиӈын. Мую мытвэтала тывык, миӈкые валг’о ныг’итикынэв’ йинтыватылг’о тайкыёв’ майӈытэнмык»,- эвыӈ А. Здетоветский инэллэчг’ын ынныӈийтыгиӈэпыӈ крайик.
Умекетылг’э нэйичинэв’ танвэтгыӈгиӈо то натвынав’ миӈкые ыччу тэйкык. Ымоӈ в’аняванма натвынав’ йиплэпав’гиӈо аӈӄатайныкэнав’ вано, йингычголав’гиӈо ыннытэпичгыӈылг’ин вэтгиӈо, то йинчоччымавык чининкинэв’ ӄулин вэтатылг’о ынныӈийтыиччетылв’ынык то ӄуччев’.
«Ымоӈ тывылг’о танвэтгыӈгиӈо кытаван нанг’ыёнав’ плиткулг’ыӈ документаӈ, то 1 гыёлг’атйиг’илгык экмитык тайкыёв’ йиплэпавык ынныӈийтыгиӈын. Мучгинэв’ ымыӈ ею котвалаӈ тит лэккы янотэтыӈ, яёг’ыӈкы ымыльг’ыӈ экмитылг’у тэнмо»,- эвыӈ В. Солодов.
Эчгыпо йинчоччымав’нэн С. Тынанто.