Эняччыгиӈо яйтаӈык то йиныплэпавык чиниваяткэнав’ вэтгиӈо юнэтылг’ин Камчаткак натанвэтгыӈнав’ энангыеватгиӈык «Лымӈылькен Камчаткан: гийникналгу то ныйийкыӄинэв’ налгу»
Аӄайпыгиӈо яйтаӈык то йиплэпавык чининваяткенав’ вэтгиӈо натанвэтгыӈнав’ омакальг’анма титэ итти энангыеватгиӈын «Лымӈылькен Камчаткан: гийникналгу то ныйийкыӄинэв’ налгу, меӈин ковэтатыӈ 1-5 тэнмыталойиг’илгык КВЦ. В’утку эллай митычг’у гамга районыӈӄо итылг’у нотаг’эӈыткынык, ымыӈ ыяваӈӄо- Олюторский, Тигильский, Алеутский.
«Мучгин умекет китыӈ танвэтгыӈкы пыӈлов’, миӈкые яйтаӈык то йиплэпавык чинкинэв’ вэтгиӈо айгытӄываятэн юнэтылг’ин Камчаткак. Тыкивыӈ, мынвэтгыльг’алла: яӄ вэтгиӈо келлаӈ тит яйтаӈык айгытӄываяткэнав’ вэтгиӈо, то ею еппы эплитэйкыкэ»,-эвыӈ ӈывома умекет инингив’ губернаторэн крайик П. Ясевич.
Митычг’а тэйкык ымыӈ ею чененкечг’энаӈ натвынав’ в’аняватгиӈо, тит эӄлэткэ ныг’итикынэв’ вано налга, мыев’ котакеметг’анӈыволаӈ, то накотайкыӈвоӈнав’ митг’алӄылу. Эняччыгиӈо котвалаӈ профучилищак 5 Елизовык, ычгынан актыка г’ынийкуйнэв’ ниӈвилӄинэв’ налгу, ӈанко наконметытванӈывоӈнав’ таналгыӈкы. Тит йиплэпавык ыннин аӄайпыгиӈын, аму выг’аёк наянтоӈвав’ӈын иччетнэӄу, меӈин явэтатэкэ в’элиткогиӈа, то янчоччымавэкынэн явалг’о в’аӈэк то ымыӈ ею тэйкык айгытӄываяткэчг’энаӈ, эвыӈ П. Ясевич.
То наяӈвоӈнав’ в’иннетык ывынг’ытэпичгыӈылг’у, тит ийкыӈ ныг’итикынэв’ сертификато.
В’утин умекетык натанвэтгыӈын пыӈыл тит митычг’а тэминӈык нанг’ыявайкынав’ электонный вано, тит йинвиткувык чининкинэв’ тэйкылг’у ымыӈ ею. Ыннэн китыӈ- “dostavka41.ru”. В’отэныӈӄо ымоӈ митычг’у айгытӄываяткэчг’энаӈ вэтатык эвилэткэ ныг’ыӈвойкынав’ инэнвилиткувык. То эмэлкэ ымыӈ яв’эннялайкэ калик миӈкые валг’о в’аӈэв’, тэминӈу то тэйкык ычгинэв’ йипыткаво. В’уткекъйит калечелай эначгыпавылг’о инэллэчг’ин то Эналлаэччатыӈӄо крайик.
Эчгыпо йинчоччымав’нэн С. Тынанто.