Инэгэю итылг’у тайкыёв’ тит в’иннетык инэнмэлэвылг’у Камчаткакенав’ тывынэн инингивэ Инэллэчг’ын Государственный Думак И. Яровая, меӈин нэекминӈын то яӈвоӈ вэтатык чиӄъивив’ йиг’илгык 2021 гэвэгиӈык. Ыннин ныг’эли, мыев’ эллай танвэтгыӈгиӈо видео-в’аняванма тыӈивылг’ин ваятэн Государственный Думак омакаӈ инэллэчг’ык крайик, Законодательный Умекетык, инэллэчг’ык краевой малав’ъяӈӄо то общественный палытыӈӄо.
«Тайкыёлӄыл инэгэйик в’эннятгиӈо энанмалавылг’ыйикыӈ наӈвон йинчоччымавык 2 яяв’очг’ыйиг’илгык. Этг’у федеральный пылв’ынтыӈ, меӈию келлаӈ бюджетыӈӄо тит вилэтык инэнмэлэвылг’у, омакаӈ инэллэчг’ык крайик то итылг’ык иччетык «Ыннэн валг’ын Россиян» Законодательный омакатыӈӄо, эмет мытынтоӈвав’лан гылпичгу энанмалавылг’ыйикыӈ, меӈию ковэталаӈ ковид-госпиталик, вэтатылг’ыйикыӈ, миӈки инг’э накойилӈывоӈнав’ в’эннятгиӈо тыг’ыллыг’ыйикыӈ то в’эннятылг’ыйикыӈ, опта наковэланӈывоӈнав’ транспортакенав’ вэлатгиӈо энанмалавылг’ыйикыӈ меӈиныйик накоёг’ыӈвоӈнав’ тыг’ыллыг’у аӄачыг’ычгиӈа то в’эннятылг’ыйикыӈ, меӈиныйик наколлаӈвоӈнав’ инэльпинӈу малавылг’ыйикыӈ яяк. Опта эллай ӄавеёчго тойгэвэгиӈыкъет кымеӈыйикыӈ, малавылг’ыйикыӈ стационарык то кымеӈыйикыӈ инэнмэлэвылг’ычгин»,- эвыӈ И. Яровая.
Инингивэ инэллэчг’ин Законодательный Умекетык А. Копыловынак аӈъянэн И. Яровая тайкыёлӄыйикъет то в’аӈланэн йинтыватык пыӈыл туризмакъет титэ йитыӈ Камчаткакен умекет ынныӈийтыгиӈэпыӈ.
«Нымэйиӈӄин ӄайлём ёнатылг’ыӈӄо крайик то Эналлаэччатыӈӄо Камчатский крайик в’иннетыкъйит крайиӈ»,- эвыӈ итылг’ын вице-губернаторо Камчатский крайик А. Кузнецов.
Йинчоччымав’нэн С. Тынанто.