Миӈкые валг’о в’эннятгиӈо кенӈыволаӈ федеральный бюджетыӈӄо, В. Солодовынак тывынэн в’аняванма каличитванэтыӈ «Гынин Дальний Восток».
2020 гэвэгиӈык Камчатский крайиӈ эллай в’эннятгиӈо Эналлаэччатыӈӄо РФ то Владимирын Путинын, тит танвэтгыӈкы пыӈлов’ юнэтылг’ин, меӈию инг’э нанг’ыныпэпав’нав’.
Тайкыёлӄылэпыӈ инэллэчг’ин РФ нэтэйкын малав’ъяк, меӈин наколӈыӈвоӈын госпиталё, тит нэв’иннетики элэк йиччык аӄачыг’ычгиӈын. Крайик нэнв’эӈэнэв’ 7 госпиталё 740 йилӄынвылг’о, котвалаӈ г’уемтэв’илг’у в’иннетылг’у. Гантоӈвав’лэн кол-центр, миӈкые козвонинӈыволаӈ ӄымек 500 юнэтылг’у ыннэн кэв’гиӈык.
Камчаткак натанвэтгыӈын яноткэн пыӈыл, тит амъел навэтатэкынав’, тит пылиткук краевой малав’ъян. Лайвыма Камчаткак М. Мишустинынак гитэнин инэнмэлэв’ъиччетылв’ыно. Ӄэй эллай эччыгиӈо бюджетные, эв’ынчам нэйилнэв’ ымыльг’ыӈ пылв’ынто, тит амъел нэнг’ылэйкынэв’ вэтгиӈо краевой малаяв’ък- 6,9 миллиардав’ пылв’ынто федеральный бюджетыӈӄо то 1,5 миллиардав’ краевоеӈӄо. Эмет 2023 гэвэгиӈык малав’ъяк яӈволаӈ итык яноткенав’ тыг’ыллыг’у. В’аняватгиӈэпыӈ В. Солодовын, эмен ыннин малав’ъян нуг’этын мыкыӈ 15 гэвэгиӈо.
«Гыммо тыкивыӈ, 2020 гэвэгиӈык мытытгымалла ӈывок омакаӈ вэтатык федеральный инэллэиччетык. Актыка вэтга ымыӈ ею йиплэпавык, эв’ынчам китыӈ яноткенав’ чаткаёӈгиӈо- йиплэпавык ёнатгиӈо Камчаткак, йингычголавык малъёнатгиӈо гамгаг’уемтэв’илг’ин крайик, тит ыччу нагайматэкынав’ юнэтык то вэтатык Камчаткак»,- пылиткома в’аняватык, эвыӈ В. Солодов.
В’аняватгиӈо гакалилинав’ ванык «Эчгыпо то этгиӈо» эначгыпав’каличитванык
Камчатский краен www.kamgov.ru
Эчгыпо йинчоччымав’нэн С. Тынанто.