О пастырю добрый, наставниче наш, преподобный отче Мартирие! Услыши еже к тебе ныне приносимое моление наше. Вемы бо, яко духом с нами пребываеши. Ты убо, преподобне, яко имея дерзновение ко Владыце Иисусу Христу Богу нашему и к Пречистой Богоматери, буди ходатай и молитвенник теплый о обители сей, юже возградил еси, и о нас, недостойных рабах твоих, живущих в ней, еяже ты просветитель сый и начальник, богособранному твоему братству помощник и заступник, яко да твоим предстательством и молитвами невредимы, на месте сем пребудем: от бесов же и злых человек ненаветованны и от всех бед и напастей свободны сохранимся. Всем же отвсюду приходящим во святую обитель твою и молящимся тебе с верою, и поклоняющимся раце мощей твоих, о еже избавитися от всякия скорби, болезни и напасти милостивне поспеши, даровати же православным мир, тишину, благоденствие и изобилие плодов земных: и о всех нас теплый предстатель ко Господу и помощник душам нашим буди, во еже отпуститися, нам согрешением нашим и молитвами твоими, Святе, избавитися нам вечнаго мучения и сподобитися царствия со всеми святыми, да славу, благодарение и поклонение возсылаем единому Богу, в троице славивому Отцу и Сыну и Святому Духу, ныне и присно и во веки веков. Аминь.
