Ымоӈ ыявак валг’ыӈӄо районыӈӄо келлаӈ энангыеватгиӈык «Лымӈылкэн Камчаткан: гийникналгу то йиннитыг’эвылг’у налгу», меӈин ӈывой вэтатык 1 тэнмыталойиг’илгык КВЦ Петропавловскак-Камчаткакен. В’утку нэкунлыг’ув’ӈынэв’ метгиӈо таналгыӈык Олюторский, Алеутский, Мильковский, Быстринский то ӄутин районыӈӄо, эвыӈ йинв’аӈанма выставкан инавийиӈылг’ын г’уемтэв’илг’ин Камчатский крайик Валентина Броневич. « 2020 гэвэгиӈын итти тыттэль ниччыӄин . То эчги эв’ынчам мытколыг’олаӈын энангыеватгиӈын мэлу нэкулӈыӈын, то митычг’у амъел котгымалаӈ вэтатык. Ымоӈ тыкопоздравлянӈынав’ ӈывогиӈыкъет выставкан, ӄайлим митычг’а ченекенкэчг’энаӈ таналгыӈкы нэкунгыйивэнӈынэв’ чининкинэв’ метгиӈо. Ӈынвычгаё яллай ыяваӈӄо айгытӄыӈӄалыӈӄо, тит йинйиг’эвык чининкин вэтгиӈа, то панэнатвык чининваяткэнакъет вэтгиӈыкъет»,- иви Валентина Броневич.
Энангыеватгиӈын «Лымӈылькэн Камчаткан: гийникналгу то йиннитыг’эвылг’у налгу” когалаӈ лыкл’эӈкинэк фестивалик «Берингиян-2021». Йив’аӈатгиӈык в’уччин выставкан мылав’лай ӄояямкэн мылав’ъиччет «Нулгур» то чав’чывачгэн мылав’ъиччет «Ангыт».
В’утин энангыеватгиӈык вэтатэ экспозициян «Энанэнаёӈавылг’о Берингията», меӈин ганчоччымав’лэн Камчаткакен краевой музея омакаӈ лиги лыӈылг’ык тэминӈык, то краевой вана миӈки каликалу накув’йипӈынав’ нынылг’этылг’ын С. П. Крашениннниковын. Гэтама йипыткаво, калечетгиӈо, лымӈылё етылг’э нэкуйгулэнӈын, миӈкые ӈывой ячвыӈчатгиӈын г’ытг’ылг’ин айгытӄываятэн.
Опта ковэтатыӈ ваны «Нучельӄын Камчаткакен». В’утку нэкунгыйивэнӈынэв’ в’аӈэв’ налгыкенав’, тэминӈу уттин то г’ытг’ымин, ымыӈ эв’эннив’ манигытг’улин то ӈынвыӄ имы ею ӄуччев’.
Эчгыпо йинчоччымав’нэн С. Тынанто.