Камчатский крайик накончоччымав’ӈынав’ йингычголавык вэтгиӈо ӄояв’ъепылг’эн, тит ныг’итикынэв’ чининкинэв’ кинуӈвапичгу то паёчатылг’о йилэк ӄотэннотайтыӈ. В’уткекъйит в’аняватэ эначгыпавылг’ыӈ З. Корбановынаӈ инингив’ инэллэчг’ин Инэллэиччетык крайик Р. Василевский.
«Мыччаӈвоӈнав’ ӄотэнычг’энаӈ в’иннетык ӄояв’ъепылг’о. Маляйговэ гинэллэчг’э Камчаткак мытъёг’ынав’ ӄояв’ъепъиччету, то мыччатав’аӈӈынав’ ыччу в’иннетык. Миӈки нымэлг’эв’ гантывалэнав’ вэтгиӈо ам коӄлалаӈ кояӈ, в’отэныӈӄо мыччатгымаллайкэ в’иннетык. Иччетылв’ынык миӈки ӈынвыӄ ӄояв’, то малялваӈ келлаӈ вэтгиӈо, ӄотэнычг’энаӈ мыччев’инетикынэв’»,- эвыӈ Р. Василевский.
Пылиткома 2020 гэвэгиӈын крайик эллай 47 тысячав’ 811 ӄояв’. Эчгикинэв’ тэнмо келлаӈ ӈыечэӈ йимкавык ӄояв’ ӈэлвылг’ыкинэв’. Наяӈвоӈнав’ опта йиныплэпавык кинуӈватапечгыӈгиӈо.
«Инэллэчг’э крайик йинтыванэн яноткэн тайкыён, тит юнэтылг’у эӄлэткэ ныг’итикынэв’ ӄоякинуӈваӈ. Нанг’ымкатикынав’ ӄояв’ гамгаӈэлвылг’ык ӈыечеӈ, тит кывыль ӄояпичгу ныг’итикынэв’ то паёчптылг’о йинвилиткувык ӄотэннотайтыӈ. Инмы эчги котвалаӈ предпринимателё, меӈию янотыӈ колалаӈ, ятан ӄун ынниг’ан валг’о еппы тэг’и»,-эвыӈ Р. Василевский.
Ӄоякинуӈвав’, еппы энма аӄачыг’ычгиӈын, накопӈылоӈвоӈнав’ азиатский инэнвилиикув’ванык. Тит йинвилиткувык ӈакые кинуӈвав’, метг’ан нэнг’ынчичг’этикынэв’ то нэнг’ыгитэйкынэв то кытаван ныг’итикынэв’ сертификато, в’аняванма эвыӈ Р. Василевский.
Эчги Камчаткак ковэталаӈ ӄоньг’айичыӈкэн ӄояв’ъепиччету. Пылиткома 2020 гэвэгиӈын инэллэчг’ын регионык иви, тит в’иннетык ӄояв’ъепиччету, краевой бюджетык 2021 гэвэгиӈэтыӈ ганчоччымав’лэнав’ 300 миллионав’ пылв’ынто.
Эчгыпо йинчоччымав’нэн С. Тынанто.