Вэтатъиччэтэ натвыгаг’ын яноткен ойпакметгиӈын лыӄлэӈкин фестивален «Берингиян-2021».
Эналватылг’а ячвыӈчатгиӈык тилик в’ины Эссо- Оссоран екминӈынин ойпакмэт ӈыёӄ миллионав’ пылв’ынто. Ӈыеӄэв’кинынаӈ еллаӈ ӈыччеӄ миллионав’ пылв’ынто. Ӈыёӄав’кэнынаӈ ойпакметгиӈын йитыӈ ыннэн миллион.
Ячвыӈчатгиӈык опта еллайкэ г’ытг’ылг’у, меӈиныйик наяявайкынав’ чининкинэв’ уттыуетикив’, нэенгыйивэтикынэв’ чининваяткэнав’ этгиӈо. 2021 гэвэгиӈык ячвыӈчатгиӈык «Лиги лыӈык этгиӈо Айгытӄыкэнав’» еллаӈ амалваӈ валг’о ойпакметгиӈо.
Меӈин яянотыӈ ячвыӈык уттыуетикэ йитыӈ ойпакметгиӈын ыннэн миллион пылв’ынто, ӈыеӄэвкинынаӈ- ӈыяӄмыллыӈэн ыстон пылв’ынто, ӈыёӄав’кэнынаӈ- мыллыӈэн ыстов’ пылв’ынто.
Ойпакметгиӈын кэтог’ыкъет А. Колегов йитики г’ытг’ылг’ыӈ,меӈин ынкыеп коячвыӈчатыӈ «Берингияк», то ӄонпыӈ котэлэӈвоӈнэн йиг’эт чененваяткэчг’энаӈ. Ойпакмэтгиӈын китыӈ- ыннэн ыстон мыллыӈэн мынгыто тысячав’ пылв’ынто. Ыннин ойпакметгиӈын кенӈывоӈ кетог’ыкъет лиги лыӈылг’ын г’ытг’ылг’ын Корякский округыӈӄо Колегов Алексей Спиридонович, ӈынвыӄ ячвыӈчатылг’ын «Беренгияк», меӈин ныг’эли эналватылг’о «Берингияк-2006», титэ ынкыӈ эллай 70 гэвэгиӈо.
Ойпакметылг’ыӈ, меӈинынэк ымыӈ йиг’эт янгалаӈнэн чининкимитг’а нэейилӈынэв’ ыннэн ыстон мыллыӈэн мынгыто тысячав’ пылв’ынто.
То ӈэвэӄ ячвыӈчатылг’а тэлэма йиг’эт наяявайкынав’ чининкинэв’ кимитг’ав’ то наягалаӈын в’ины уттыуетикэ йитыӈ яӈъя валг’ын ойпакмэт (грант)ыннэн ыстон мыллыӈэн мынгыто тысячав’ пылв’ынто, мыев’ котгыманӈыволаӈ яйтаӈык то йингычголавык г’ытг’ылг’атгиӈо чининкинэк в’уйвык. Ыннин ойпакмэт китыӈ «Яйтаӈгиӈыкъет айгытӄываятэн этгиӈо».
Пылв’ынтыойпакметгиӈо ганчоччымав’лэнав’ спонсорыйик , меӈию в’эннялай юмэкэвык мыкыӈ мынгыткэн миллионав’ пылв’ынто.
Эчгыпо йинчоччымав’нэн С. Тынанто.