Февраль 9. Аҧснытәи аҳәынҭқарратә университет Нарҭдырреи адәынтәи афольклорҭҵаареи рцентр иаиуит «Евразиа ажәларқәа рлакәқәа» асериала ааигәа Калмыкиа Ареспублика Елиста ақалақь аҟны иҭыҵыз аҭҵаарадырратә ҭыжьымҭа иҷыдоу аекземплиарқәа.
Ашәҟәы еиднакылоит аҧсуаа, адыгцәа, алтаиаа, абашкирцәа, абуриатцәа, абретонцәа, агагаузцәа, аирландцәа, аказахцәа, акалмыкцәа, анемеццәа, ауаҧсаа, аурысқәа, ататарцәа, аузбекцәа, афранцызцәа, ачеченцәа, аиакутцәа, ашотландцәа уҳәа ажәларқәа рҟны иуҧыло зсиужетқәа еишьашәалоу жәлар рлакәқәа, хаҭала «Иаҩысҭаау аҭҵаарадырра» (хитрая наука) сиужеттә типк аҳасабала иуԥыло алакәқәа.
Ари аизга ианылеит аҧсуа жәлар еицырдыруа «Ҳаиҭ илакә» асиужет авариантқәа ируаку «Офф илакә». Уи аурысшәахь еиҭаргеит, аус адырулеит, аилыркаага ацҵаны акьыԥхь иаздырхиеит Нарҭдырреи адәынтәи афольклорҭҵаареи рцентр аҭҵаарадырратә усзуҩцәа Мадонна Ҧлиаҧҳаи Есма Ҭодуаҧҳаи.
Макьаназы шықәсқәак роуп иҵуа «Евразиа ажәларқәа рлакәқәа» асериала ари аизга аҭыжьра аҧшьыргеижьҭеи, аха иара аӡбахә аҭҵаарадырратә еилазаараҿы ирдыруа иҟалахьеит. Уи алыршан Б. Б. Городовиков ихьӡ зху Калмыкиатәи аҳәынҭқарратә университет аҟны еиҿкааз жәларбжьаратәи афольклортә проект аҳәаақәа ирҭагӡаны.
Апроект еиднакылоит Урыстәыла, Китаи, Казахстан, Узбекистан уҳәа егьырҭ Евразиа атәылақәа жәпакы рҟынтә еицырдыруа афольклорҭҵааҩцәа. Апроект напхгара азылуеит афилологиатә ҭҵаарадыррақәа рдоктор, Калмыкиатәи аҳәынҭқарратә университет Жәларбжьаратәи аҭҵаарадырратә центр «Амонгол жәларқәа ркультуратә ҭынха» аиҳабы, Акалмык филологиеи мрагылараҭҵаареи ринститут афольклори асоцио-культуратә усуреи ркафедра апрофессор Евдокиа Хабунова.
Аизгаҿы атекстқәа ирываргыланы икьыҧхьуп аоригиналқәа, англыз бызшәала аннотациа ҟаҵоуп, ирыцуп иаазыркьаҿу ажәар.
Аҭыжьымҭа редактор хадас дамоуп афилологиатә ҭҵаарадыррақәа рдоктор Ирина Кульганиок.
Акандидаттә диссертациа ахьчара зҽазыҟазҵо аҵарауаа қәыҧшцәа Мадонна Ҧлиаҧҳаи Есма Ҭодуаҧҳаи хаҭала иҭырҵаауа атемақәа хаз-хазуп. Мадонна лтема рызкуп аҧсуа нашанатә лакәқәа, Есма лакәзар, афольклорҭҵаараҿы акрызҵазкуа ахырхарҭа – амифологиа. Аха, урҭ инарҷыданы, рҩыџьагьы Нарҭдырреи адәынтәи афольклорҭҵаареи рцентр аҿы рнапы злаку рацәоуп. Иахьа дара аус рыдырулоит афольклорҭҵааҩ, академик, Ацентр аиҳабы Зураб Џьапуа Санкт-Петербург архивқәа руак аҿы ииҧшааз Н. И. Марр инапылаҩыра аматериалқәа.
Ирзеиӷьаҳшьап нас аҵарауаа қәыҧшцәа рнапы злаку аус аҿы аманшәалареи ақәҿиарақәеи!
Алхас Чхамалиа