Киинэ устата болҕомто кырыымпаҕа ууруллубута эмиэ интэриэһинэй. Эмчит дьахтар кырыымпаҕа оонньуон баҕарар, оҕо оонньуурун иһийэн истэр, ыалтан уларсар. Төрүт дорҕоон алыбар уйдаран, сирдээҕи олох кыһалҕатын умна быһыытыйарыгар дьиҥнээх доҕор да курдук ылыныллар быһыылаах.
Үйэлэри уҥуордаан кэлбит төрүт дорҕоон хас биирдиибитигэр иҥэ сылдьар тыыннаах эйгэ буолар. Кылыһах эбэтэр кыллаах кырыымпа сахалар түҥ былыргыттан илдьэ кэлбит төрүт тэрилбит буолар. Кыллаах кырыымпа үөскүүрүн түҥ былыргы төрүөтэ – ох саа кылын аалан, тыас-уус саҕан тыаһаппыттара диэн сабаҕаланар. Кырыымпа туһунан киинэҕэ этиллэрэ, каадырга көстөрө – саха киһитин сүрэҕин ортотунан киирэр.
Бу тэрил дьиктитэ диэн, кыл аҥаар уһугун ытыран баран, ууннары тарда-тарда тарбаҕынан таарыйталаатахха, бэйэҕэр иһиллэр дорҕоон үөскүүр. Араастаан тыҥкыныыр, лыҥкыныыр матыыбы былыр бүгэн олорон истэллэрэ үһү. Аттыгар баар киһиэхэ иһиллибэт эбит. Оччотугар бу эмчит дьахтарбыт кырыымпаҕа майгынныыр курдук. Кини эмиэ көннөрү дьон билбэтин билэр, көрбөтүн көрөр, кыайбатын кыайар уһулуччулаах сөҕүмэр күүстээх буоллаҕа.
Тоҕо эрэ НВК-ҕа көстүбүт Күннэй Кардашевская ийэтин интервьютун санаан ылбытым. Кини онно эппитэ: «Итинник үөһэттэн айдарыылаах дьон бу сирдээҕи олоххо кэлэ, төрүү туруохтара, онуоха биһиги бэлэм буолуохтаахпыт. Кинилэри ылыныах, өйдүөх тустаахпыт». Чахчыта даҕаны, дьон-сэргэ ураты дьону хайдах ылынарый? Тылын-өһүн төһө ылынарый, туох диирий? Киинэҕэ көстүбүт Чыскыырай уобараһыгар курдук дьон улаханнык итэҕэйбэт, аанньа ахтыбат дуу... Билбэтим.
Ойуун – түҥ былыргы үгэстэри илдьэ сылдьааччы уонна харыстааччы. Былыргы дьылларга улуу ойуун омугун ааспыт суолун бүрүйээччитэ, бүгүҥҥү суолун маныыһыта уонна кэлэр суолун ыйдаҥардааччыта этэ.
Олус интэриэһинэй ракурсар көстөллөр, урут итинник ньымалары бэлиэтээн көрөөччүм суоҕа быһыылаах. Остуол анныттан усталлар, олоппос үрдүттэн, сиэркилэ нөҥүө. Астык.
Бу оруол чахчы Чыскыырай оруола эбит диэн бэлиэтээн этиэм этэ. Киниэхэ анаан үөһэттэн суруллубут курдук.
Миэхэ тус бэйэбэр киинэҕэ туох эрэ история тиийбэтэ. Өйдүүгүт, «Знахарь» диэн поляктар устубут киинэлэрэ баара дии. Биллэр хирург өйүн сүтэрэн тугу да өйдөөбөт, инньэ гынан ускул-тэскил сылдьар, билбэт ыалыгар олорор. Кини тугунан дьарыктаммытын өйдөөбөт эрээри ыарыһахтары эмтиир дьоҕурдааҕын сэрэйэр, эпэрээссийэҕэ тугу гыныахтааҕын подсознательно барытын өйдүүр. Ороҥҥо сытар уолу атаҕар туруорар, оһолго түбэспит кыыһы эмтиир. Кэлин ол кыыс төрөппүт кыыһа буолан хаалар. Ийэм сөбүлүүр киинэлэриттэн биирдэстэрэ. Итиниэхэ майгынныыр историяны баҕарбытым.
Билиҥҥи кэмҥэ омуктар маннык ис хоһоонноох киинэни көрө иликтэригэр итэҕэйиллэр. Кинилэргэ бу киинэ – шок, арыйыы, дьикти-дьиибэ.
Түмүктээн эттэххэ, киинэни көрөөччү хайдах ылынарыттан тутулуктаах. Быһа түһэн «оннук» диир сатаммат. Кинотеатртан тахсан баран туох иэйиилэр миигин бастакы уочарат кууспуттарын кыайан быһаарбатаҕым. Сыта-тура толкуйдуу түһэргэ, буһарарга бириэмэ наада курдуга. Ыллыҥ даҕаны биир тылынан киһи быһааран эппэт. Судургутук – эмтиир уонна арыгылыыр дьахтар ыарахан олоҕун туһунан – диэххэ сөп эрээри, эппитим курдук, иһэ истээх, оннук боростуой буолбатах...
Оксана Манчурина