Балтач район үзәк китапханәсе хезмәткәрләре татар халкының бөек шагыйре - Муса Жәлил тууына 115 ел тулу уңаеннан “Гомерем минем моңлы бер җыр иде...” әдәби акциясе оештырды
Татар халкының бөек шагыйре - Муса Жәлилнең тууына 115 ел тулуга багышлап Балтач Үзәк китапханә хезмәткәрләре “Гомерем минем моңлы бер җыр иде...” исемле әдәби акциясе оештырды. Герой - шагыйрьнең иҗадына битараф булмаган китап укучылар, 5 февральдән алып 15 февральгә кадәр дәвам иткән акциядә, Җәлил исемен горурлык белән искә алып, кыюлык һәм батырлык үрнәге булган шигырьләрен яратып укый . Менә алар: “Юллар”, “Ышанма”, “Бүген таңда ап-ак карлар яуды”, “Дару”, “Терелү”, ”Вәхшәт”, “Кызыл ромашка“, “Яулык”, “Бер үгет”, “Җырларым”, “Бүреләр” һәм башкалар.
Альбина Гыйләҗева, Гөлшат Ихсанова кебек олы яшьтәге укучылар белән беррәттән, Аскар Галиев, Марат Габдрахманов, Чынгыз Хәсәнов, Гөлнара Әхкамова, Лиана Шәнгәрәева, Алина Хакимова, Ренас Такаев, Вадим Шәйхуллин, Чулпан Садртдинова кебек мәктәп яшендәгеләр дә катнашты әлеге чарада. Китапханәнең күптәнге дуслары Айдар Сираев, Гөлназ Мулланурова, Зөлфия Зәйруллина, Мәгъдән Фазыловлар бу юлы да читтә калмады.
Шагыйрь тоткынлыкта “Батырлык турында” язган шигырендә:
“Исмең калсын, үзең үлсәң дә,Тарихларда укып ятларлык” ,- дип язган. Чыннан да, Җәлилнең тормышы җырга тиң. Җыр үлемсез булган кебек, аның шигырьләре, исеме дә үлемсез.
Балтач үзәк район китапханә хезмәткәрләре, үз чиратында, акциядә барлык катнашучыларга зур рәхмәтен белдерә. Киләчәктә дә яшь буын да китапка мәхәббәт сүрелмәсен, әдәби әсәрләрдәге, шигырьләрдәге матурлыкны һәм батырлыкны күрә белергә өйрәнсен иде, дигән теләктә кала.