Саҡмағош районының Саҡмағош ауылында улы Илдустың (ул 1943 йылғы) ҡәҙер-хөрмәтендә 100 йәшлек Фәүзиә Еникеева ғүмер кисерә.
Инәйҙең тормошона йәм өҫтәп, ейәне Илшат Өфөнән ҡайтып төшкән, иң мөһиме - улар менән бергә йәшәргә. Йөҙйәшәргә күптән түгел Илшат менән Әлиәнең туйында ҡатнашыу бәхете тейгән. Ул байрамдың иң түрендә ултырған.
"Ҡартлығыңды йәштән хәстәрлә тигәндәре дөп-дөрөҫ, – ти Фәүзиә Еникеева. – Күңелем тыныс, берҙән-бер улым Илдус – терәк тә, таяныс та миңә. Өҫтөм ҡараулы, торған урыным йылы, бер нәмәгә лә мохтажлыҡ кисермәйем".
Фәүзиә Сәләх ҡыҙы һөйләүенсә, 1940 йылда Фазләхмәт тигән егеткә кейәүгә сыҡҡан. Бөйөк Ватан һуғышы башланыу менән ирен фронтҡа оҙаталар. Йәштәр Ырымбур өлкәһенең Тоцк хәрби лагерында һуңғы тапҡыр осраша, дөрөҫөрәге, 1942 йылда армияға алынған йәштәрҙе, шул иҫәптән һалдат Еникеевты һуғыш алымдарына өйрәтеү маҡсатында шунда ебәрәләр. Яҡын бит: йәш Фәүзиә ике уйламай Ырымбур тарафтарына ашыға...
"Күптәр оҙон ғүмерле булыуҙың сере менән ҡыҙыҡһына, – ти Фәүзиә инәй. – Кешеләргә тик изгелек ҡылыу, яман уйҙарҙы күңелдә йөрөтмәү, асыу тотмау – бына ошо сифаттарға эйә булғандар минең ише оҙаҡ йәшәйәсәк. Онотҡанмын, дөрөҫ туҡланығыҙ, хәрәкәт итеү шулай уҡ ғүмерҙе оҙайта. Өс ейән-ейәнсәрем, өс бүлә-бүләсәрем бар - бәхетлемен".
Автор: Илдар Акьюлов
Присоединяйтесь к обсуждению новости в наших группах: Вконтакте , Одноклассники , Facebook .
