Иччетык эналлагиӈэпыӈ ӈыволай омакаӈ итык иччет территориальный йиплэпав’гиӈэпыӈ то инэллэиччет Корякский округкэн. Нытуйӄин министерстван йитики тилик государстегный эналлагиӈо крайик тит тэйкык то яёг’ыӈкы этгиӈо местный эналлагиӈэпыӈ то миӈкые валг’ын нитики административно- территориальный этгиӈын регионык, то ымын наятанвэтгыӈкэнав’ пыӈлов’ яӈъя валг’ыкъет катгогиӈык Корякский округэн.
В. Солодовынак поздравиннин С. Лебедев, мыев’ ынно нанпыгаг’ын инэллэк иччет гамга в’уйвыкин эналлагиӈо то йиплэпавык Корякский округ. Ив’нин тит нымэлг’эв’ нывэтатэкэ.
Инэллэчг’ын регионык кивыӈ, тойчыг’ычг’энаӈ омакаӈ районык вэтатык, то тит ныг’итикынэв’ выччетылг’у йиплэпав’гиӈо Корякский округык. В. Солодов кивыӈ, ыннин иччет чаймыӈ ныг’ыӈвон итык ваятыӈ.
В’утин иччетык наянтоӈвав’ӈынав’ этг’у вэтатвано Олюторский, Пенжинский то Карагинский районык. Паланык япелатык вэтатъиччет, меӈин опта явэтатэкэ Тигильский районэтыӈ.
«Тыкивыӈ, янотыӈ элэк йиччык аӄайпыгиӈо юнэтылг’ин, тит нымэлг’эв’ нэюнэтикынэв’ гамгаг’уемтэв’илг’у,- эвыӈ Лебедев.- Омакаӈ гамгаинэллэиччетык мыччаӈвоӈнав’ оптимизироватык этгиӈо тайкыёлӄылэн йиплэпавык Корякский округ. Тэйкык социально- экономикакенав’ этгиӈо гамга районык, янг’ав’ явак пылв’ынто, меӈию ятвалайкэ».
С. Лебедев эвыӈ, иччетин котваӈ интернет-каличитваны то гантывалэнав’ ӄуччев’ каличитвано, ымоӈ гайматылг’о в’уткые накаличитикынав’ то ныг’ыпӈылойкынав’.
Йиньнимэв’нэн С. Тынанто