Йәмғиәттә агрессия, психологик баҫым күренештәренә, ғаиләләрҙә шаҡ ҡатырлыҡ ирекһеҙләү, йәберләү ваҡиғаларына шаһитбыҙ, “өйҙәге сүпте” йәшереүе ҡыйынлашты хәҙер. Ошо көндәрҙә Беренсе каналда барған “Мужское/Женское “ тапшырыуында бер ғаилә яҙмышы шуға асыҡ миҫал.
Өфөлә йәшәгән Алена ғаиләләге түҙеп тора алмаҫлыҡ хәл һәм ире менән айырылышыуҙың ауырлығы тураһында һөйләне. Ире Борис ғаиләне ҡурҡыуҙа тотҡан, ә айырылышҡандан һуң уның бөтә туғандарын, балаларын ҡырып бөтөрәсәген вәғәҙәләгән.
Уларҙың никахына 12 йыл, 11 йәшлек ҡыҙҙары һәм биш йәшлек улдары бар. Борис ҡатынына хыянат итеүҙән тыш, мыҫҡылларға, кәмһетергә яратҡан, балаларын язалаған. Мөнәсәбәт ҡырҡыулаша барғас, Алена айырылырға ҡарар итә. Был яңылыҡ ирҙе сығырынан-сығара.
”Мин һеҙҙең бөтәгеҙҙе лә үлтерәм һәм үҙемде лә. Барығыҙҙы ла яндырам, үлтерәм, берегеҙҙе лә ҡалдырмайым, балаларҙы ла, әсәйеңде лә, һине лә. Миңә барыбер үлем”, - ҡатын иренең ҡот осҡос һүҙҙәрен яҙҙырып алған.
Әле ғаилә айырым йәшәһә лә, даими ҡурҡыу аҫтында. Алена бер нисә тапҡыр полицияға ғариза бирә, тик иренең төҙәлеренә һуҡыр ышаныуы арҡаһында уларҙы кире ала. Ир эфирҙа ҡатындың үҙен хыянатта ғәйепләргә маташа, ә балаларын ни өсөн йәберләүен, улар алдында порно ҡарауын аңлата алмай. Баҡһаң, ирҙең никахтан тыш тыуған балалары ла бар икән. Алена менән Бористың 11 йәшлек ҡыҙы һөйләгән һүҙҙәрҙән сәстәр үрә торорлоҡ!
“Ул миңә ғүмер биргән, ул мине үлтерәсәк. Шулай тип әйтте. Әгәр ҙә беҙ өйгә әйләнеп ҡайтһаҡ, ашатмаясаҡмын, тине... Сумкамды йыртасаҡ, китаптарымды, әйберҙәремде юҡҡа сығарасаҡ...” Студия берҙәм рәүештә Бористың ғаиләһенә яҡын килергә лә хоҡуғы булмауын белдерҙе. Уға ғаиләһен үлтереү менән ҡурҡытыуы өсөн биш йылға иркенән мәхрүм итеү янай.
Программа барышында полицейскийҙар Бористы бүлексәгә алып китте, Алена яңынан уға ғариза яҙасаҡ.
Бындай ҡурҡыныс ваҡиғалар, енәйәттәр һис тә һирәк күренеш түгел. Республикала ла шаҡ ҡатырған хәлдәр булып тора. Ғаиләлә ирекһеҙләүгә дусар ҡатындарға, балаларға ярҙам һорап ҡайҙа барып төртөлөргә? Күпме генә был хаҡта һөйләһәк тә, әллә ни үҙгәреш күҙәтелмәй. Рәнйетелгән ғаиләләргә юридик, психологик, матди ярҙам күрһәтә алырлыҡ берҙәм үҙәк һаман да республикала юҡ.
Автор: Дина Арсланова