433-ші Қара пайым-сөз: Алла Тағала қаламасын, егер қаласа, қазақ үшін бәрі де апыр-топыр болары сөзсіз!..

Осы қазір ғана кеше қызметінің ең соңғы күнін өткізген АҚШ-тың бұрынғы мемлекеттік хатшысы Майкл Помпео әлемде тұңғыш болып Қытайды «Ұйғыр ұлты мен мен басқа шағын ұлыстарға (қазақ, қырғыз және т.б.) геноцид жасап жатыр» деп айыптады. АҚШ-тың жаңа сайланған президенті Джо Байден де Қытайды «шағын ұлттар мен ұлыстарға геноцид жасап жатыр» деп айыптаған болатын. Бұл әрине саясат және оның арты Гаагадағы халықаралық сотпен аяқтала ма, аяқталмай ма, ол жағы белгісіз. Бірақ күндердің күнінде Қытайдың ашуы қозып, жынданып: «керек болса, мәә, ұйғырың мен басқаларыңды алып кетіңдер» десе, қазақтар оларды құшақ жайып қарсы алар ма еді? Әрине, жоқ! Себебі біз қорқақпыз. Ұйғырлар жерімізге кіріп алып, бірте-бірте қазақты жойып жібереді деп қорқамыз. Бірақ айналып келгенде, ұйғырлар да біздерге тілі, ділі, қаны-мәні жақын түркі халқы. Әйтсе де тарихтан «әбден таяқ жеген» жетім-жесірліктің көз жасы, қазақ үшін нәсілдік бауырлықтан жоғары тұрары сөзсіз. Мен осылай айтқандықтан, біз осылай ойлағандықтан, бәрі де біз ойлағандай болады деу күпірлік. Еуропалықтарда «Never say never» (Никогда не говори никогда) деген бір мәтел бар. Алла Тағала егер қаласа, бәрі де апыр-топыр болып, үстімізге рұқсат сұрамастан ұйғырлар да басып кіреді, қорқақ қазақ кенеттен батыр болып вьетнамдықтардың АҚШ-пен тайсалмай соғысқаны сияқты «қытайға да, ресейге де, қарсы шабады». Тарлан тарихтан мұндай мысалдардың мыңын келтіруге болады. Сұға берудің де, бұға берудің де шегі болады...

(Автордың «Иман және Заман» журналындағы барлық жазбаларын, төмендегі сілтеме бойынша тауып алуға болады: https://zen.yandex.ru/id/5f114bd6e99a7e1d3a011730)