432-ші Қара пайым-сөз: Вакцина үшін «аламан көкпар» тартыста бай елдер жеңіп, кедей елдер жеңілуде...

Дүниежүзіндегі ең жұмбақ халық орыстар емес – қазақтар екендігінде дау жоқ. Бір қазақтың миы мен көңілінде не бар екенін тек екінші қазақ қана түсінеді (кейде ешкім де түсінбейді). Тойға-қонаққа шақырса қазақ «бармаса ұят болады» деп тәжі-індетке пысқырмай темпеңдеп жортып жетіп барады. Дәл қазір біздің отбасымызды шақырса, әйелім сөзге келмей өзінің, менің, бала-шағаның бір киерін дереу шифоньерден шығара бастайды. Ойбай-ау, қайдағы той, қайдағы қонақ, тәжі індетті қайтеміз десем «Айдан салбырап түстің бе, қайдағы індет!» деп ызыңдап әңгімесін ұршықша есе бастайды. Содан бір Аллаға сыйынып шақырған жерге баруға тура келеді. Сіздерге өтірік, маған шын, барғанша-келгенше бар білетін шиплық дұғаларымды оқып келемін. Бір таң қаларлығы әлі аманбыз, ешқайсымыз ауырған жоқпыз. Бұл жай бүкіл қазақтың басынан күнде өтіп жатыр. Дәл қазір осы жазбаны жазып отырғанда, бүкіл қазақ жерінде бір-біріне қонаққа кетіп бара жатқан қазақ болмаса мұрнымды кесіп берейін. Әлде біздің Қазақстанда шынымен тәжі-індет жоқ па (әлі күнге дейін үрейленіп қорқып жүрген қазақ көрген жоқпын), әлде біз нағыз ақымақпыз ба, аузым барып айта алмай отырмын. Тәжі-дертке қарсы вакциналар шыға бастағалы дәл осы қазірге дейін 39 млн доза вакцина шығарылып, ол ақшасы көп 49 елге тарап кетіпті. Атауы айтылмайды, бірақ қолын жайған бір кедей елге небәрі ... 25 доза вакцина жіберіліпті. Естеріңізге сала кетейін Қазақстанда вакцина салу 1-ақпанда басталады. Бірақ мен де, отбасым да бұл вакцинаны тек зорласа ғана салдыратын шығармыз. Себебі өз басым Бір Аллаға сенемін, тәжі-індеттің бар екеніне сенемін, бірақ осы вакциналар індеттен құтқарады дегенге сенбеймін. Біртүрлі көңілім тартпайды. Себеп біреу ғана. Мен – қазақпын. Күшті болсаң мені түсініп көр (жазбамның басындағы сөздерді қайта оқыңыз)...