Дыгын оонньууларын кыайыан сөптөөх Уус Алдан уолаттара “Боотурга” дьарыктаналлар дуо?
– Эрэл Сивцев уонна Никита (Геракл) Новгородов Дүпсүн уолаттара дьарыктаналлар. Бу уолаттар сыллата ыытыллар Дүпсүн оонньуулара күрэхтэн үүнэн-сайдан тахсыбыттара. Кинилэр миэхэ 9-с кылаастан баҕа өттүлэринэн эрчиллэллэр. Маҥнай бэйэлэрэ туспа былаанынан устудьуоннары кытта дьарыктаммыттара. Ол сылдьан сүрдээх баҕалаахтарын көрдөрдүлэр. Саастара өссө даҕаны эдэр, ыйааһыннара кыра, онон систэрин этэ ситтэҕинэ, бууттарын этэ бустаҕына инникитин тыас таһаарыахтара. Гера Новгородов быйыл өрөспүүбүлүкэҕэ 3 миэстэ буолан, Дыгын оонньуутугар рейтиҥинэн киирэн кытынна. Оттон Эрэл Сивцев былырыыҥҥы Дыгын онньууларыгар сүүмэрдиир түһүмэхтэригэр ситиһиилээхтик кыттыбыта. Кинилэр сүрдээх кэскиллээх ыччаттар. Кэлэр сылга Манчаары оонньууларыгар многоборьеҕа Эрэл Сивцев 70 киилэҕэ диэри, Гера Новгородов 70-тан үөһээ киилэҕэ бэлэмнэнэллэр.
Өссө биир Семен Ануфриев диэн уол баара дии, ол уол дьарыктаммат буолла дуо?
– Кини билигин даҕаны дьарыктанар. Дьиҥэр ити уолу многоборьеҕа кыттыан сөптөөх диэн харахпынан сүрдээҕин сэргии, сөбүлүү көрбүтүм. Уҥуоҕа үрдүгэ, илиитин-атаҕын олоруута, баазата барыта баар. Ол гынан баран киһим өйө-санаата билигин мас тардыһыытыгар сылдьар, онно улахан болҕомтону уурар. Ол да буоллар кыра кыралаан улуус иһинээҕи многоборье күрэхтэрин кэрийэн кыттар.
Тус олоххор киириэххэ, төрөппүт уолаттарыҥ эмиэ спортсменнар дуо?
– Улахан уолум үрдүкү кылаастарга мас тардыһыытынан дьарыктаммыта, билигин Екатеринбурга устудьуоннуур. Онно эрчиллэр усулуобуйа суох буолан дьарыгын тохтотто. Кыра уолум Айаал 1-гы кылаастан тустуунан дьарыктанар. Айаалы оскуолаҕа киирэр сылыгар Кэптэнигэ тустуунан дьарыктаннын диэн анаан-минээн Анатолий Васильевич Олесовка ыыппыппыт. Онтон төрдүскэ куоракка 3 №-дээх оҕо успуордун оскуолатыгар киирбитэ. Онно Иннокентий Кочкиҥҥа, Никита Никифоровка дьарыктаммыта. Билигин олимпиада эрэллэрин бэлэмниир училище устудьуона.
Этэҥҥэ буоллаҕына, Айаал Белолюбскай диэн ааты сотору истиһиикпит, туох ситиһиилээҕий?
– Саамай улахан ситиһиитэ быйыл, эдэрдэргэ Арассыыйаҕа боруонсаны ылла. Ол иннинэ оҕолорго Арассыыйаҕа 3-с, Арассыыйа үөрэнээччилэрин спартакиадатыгар 3-с буолуталаабыта.
Инники былааннарга туох баарый?
– Былырыын Баатаҕайга ыытыллыбыт улуустааҕы олоҥхо ыһыаҕар эһэбит Петр Лугинов аатынан кини сыдьааннара буолан түмсэн, Баатаҕай нэһилиэгин дьаһалтата, Уус Алдан улууһун успуорка салалтата кыттыгас улуус таһымнаах многоборьеҕа күрэхтэһии ыыппыппыт. Онтукайбытын салгыы өрөспүүбүлүкэ таһымнаан быйыл ыытыахтаах этибит даҕаны пандемиянан тохтообута. Эһиил этэҥҥэ буоллаҕына эмиэ былааҥҥа киллэттэрэн сыллата ыыппыт киһи диэн баҕа санаалаахпыт.
Итиэннэ инникитин “Боотур” кулууп кыра саастаах иитиллээччилэригэр күрэхтэһиилэр түмүктэринэн талан, анал спортивнай бөлөх тэрийиэхпин баҕарабын.
Түмүктүүр ыйытыы, Дыгын оонньууларын кыайыылааҕа буоларга киһиттэн туох хаачыстыба ирдэнэр?
– Киһи барыта дэгиттэр буолан төрөөбөт. Дьулуурдаах, баҕалаах, тулуурдаах киһи Дыгын оонньууларын кыайыылааҕа буолуон сөп.
Айаал МОЛОКОТИН