Билиҥҥи туругунан эн Дыгын оонньууларын 7-тэ кыайбыт рекордкун куоһарыан сөптөөх боотурдар бааллар дуо?
– Бааллар бөҕө буоллаҕа, Егор Филипповка оннук сыалы-соругу туруоран дьарыктана сылдьабыт, ону хомойуох иһин быйыл үһүс буолла. Оҕугар уонна хапсаҕайыгар табыллыбата. Пандемиянан сибээстээн дьарыга даҕаны ситэтэ суох.
Бэйэҥ билигин спортивнай форманы тута сылдьар гына дьарыктанаҕын дуо?
– Оннук күүскэ дьарыктаммаппын. Оҕолору эрчийэрбэр хамсаныыларын көрдөрөн биэрэбин уонна эт-хаан эрчиллиилэрин оҥоробун. Төрүкү дьарыктана сылдьыбыт киһи этэ-хаана син биир хамсаныыны ирдиир, ону кыра-кыралаан биэрэ сылдьыахха наада.
“Боотур” успуорт кулуубун хас сыллаахха арыйбыккыный?
– 2017 сылтан күрэхтэһиилэрбин түмүктээн баран оҕолору дьарыктыырбын саҕалаабытым. Улахаттары 2015 сылтан дьарыктыыбын.
Нэдиэлэҕэ хаста дьарыктаналларый?
– Оҕо уһуйаанын иитиллээччилэрэ, алын сүһүөх кылаас оҕолоро нэдиэлэҕэ иккитэ сылдьаллар. Орто сүһүөх кылаас үөрэнээччилэрэ нэдиэлэҕэ үстэ, онтон устудьуоннар, эр дьон алтата дьарыктаналлар.
Бары көрүҥҥэ барытыгар дьарыктыыгын буоллаҕа?
– Кыралары биир күннэригэр сүрүн көрүҥнэри, тутум эргиир тиэхиньикэтин үөрэтэбин, сүүрэргэ, ыстанарга дьарыктыыбын уонна эти-хааны бэлэмниир эрчиллиилэри оҥотторобун. Оттон 6-7 кылаастан сыыйа-баайа хапсаҕай мас тардыһыыта эбиллэн биэрэр. Улахаттары буоллаҕына, күнүнэн биирдии көрүҥҥэ дьарыктыыбын.
“Боотур” баазата ханна баарый? Төһө киһи дьарыктанарый?
– Улахан дьоҥҥо икки бөлөхтөөхпүн, мас тардыһааччылар туһунан уонна многобрье диэн эмиэ туһунан арааран 70-ча киһини дьарыктыыбын. Оҕолорум эмиэ элбэхтэр. Онон элбэх киһини дьарыктыырбын кэнники ыарырҕаттым. Баазабыт “Модун” спорткомплекска баар. Кэнники оҕолору дьарыктыырбар көмөлөһөөччү тириэньэрдэнним.
Куорат уонна тыа сирин оҕотун тэҥнээтэххэ, эт-хаан сайдыытынан төһө уратылаахтарый?
– Уратылара киһи хараҕар быраҕыллар, төрүкү куораттар бааллар уонна тыаттан ситимнээх оҕолор, оннооҕор олор араастаһаллар. Тыаттан тардыылаах оҕолор сайынын дэриэбинэҕэ бараннар үлэлээн-хамсаан, буһан-хатан быдан сайдыылаахтар. Онон куорат оҕотун дьарыктыыр сүрдээх уустук эбит. Барыларыгар тустаах сыһыан наада, биир халыыпка киһи сатаан киллэрбэт. Аны туран сыал-сорук эмиэ атын буолар. Хайа эрэ төрөппүт оҕотун успуорка ситиһиилээх буоллун диэн аҕалар. Сорохтор оҕобут наһаа олорон хаалбатын, эт-хаан өттүнэн сайыннын диэн биэрэллэр.
Салҕыытын кэлэр сырыыга ааҕыҥ