Тохсунньу 31 күнүгэр Н.М. Родионова аатынан оҕо дьоҕурун сайыннарар киин IT-киинигэр «Оҕолору оһуохайга үөрэтии» Сунтаар улууһун фольклорга уһуйаачыларга аналлаах семинар-практикум буолан ааста. Семинары тэрилтэ салайааччыта Антонова Ангелина Владимировна киирии тылынан аста. Салгыы Спиридонова Тамара Николаевна, СЦДТ фольклорга уһуйааччыта, бэйэтин көрүүлэрин үллэһиннэ уонна үлэтин уопутуттан кэпсээтэ. Сунтаар улууһун култууратын уонна айылгытын салалтатын координационнай салаа сэбиэдиссэйэ, Оһуокай түмсүүтүн салайааччыта Меркурьева Саргылана Дмитриевна култуураҕа инники былааннары кытта билиһиннэрдэ, оһуохайы үөрэтиигэ сүрүн түһүмэхтэргэ тоһоҕолоон тохтоото.
Семинар сүрүн чааһыгар Афанасьева Мария Павловна оһуохайы оҕолорго хайдах үөрэтэрин маастар-кылаас көрдөрдө. Билиҥҥи оһуохайга туох сыыһалар баалларын ыйда. Кыттаачылары оһуохайга ыҥырыыттан саҕалаан көтүтүүгэ диэри туруоран үҥкүүлэтэн, ыллатан көрдөрдө.
Иккис маастар-кылааһы Зедгенидзева Светлана Николаевна ыытта. Кини оҕону аан бастаан куолаһын чөллөрүтэн аһарга, сатаан сөпкө тыынарга үөрэтэрин сүрүннээн бэлиэтээтэ. Кыттааччылар оһуохай тылын хоһуйарга ханнык ньымалары туһаныахха сөбүн ыйыталаспыттарыгар бэйэтин санаатын үллэһиннэ.
Кэпсэтиилэргэ кыттааччылар бэйэлэрин мунаахсыйар боппуруостарыгар сөптөөх эппиэттэри ыллылар уонна баҕа санааларын эттилэр.
Семинар түмүгэр сүрүннээн маннык этиилэр киирдилэр:
1. Оһуохайга аналлаах практическай, үөрэтэр семинардар тиһигин быспакка буолаллара наадалаах (тута хоһуйууга)
2. Атын улуус уһуйааччыларын кытта уопут атастаһыыта, биллиилээх оһуохайдьыттары кытта көрсүһүү тэрийиллэрэ буоллар.
3. Оһуохай күрэхтэрин саастарынан чопчу ыйан туран бөлөхтөрүнэн, куусталарынан арааран элбэхтик тэрийэргэ.
4. Саҥа оһуохай тылын этэр баҕалаах эдэр дьоҥҥо уһуйаан тэриллэрэр буоллар.
Юлия Михайловна Ананьева,
фольклор куруһуогун салайааччыта
