Чăваш халăхне çутта кăлараканĕ, аслă вĕрентекенĕмĕр Иван Яковлевич Яковлев çуралнăранпа кăçал 175 çул çитет.Чăваш Ен Пуçлăхĕ Олег Николаев Иван Яковлевичăн çуралнă кунне çĕршыв шайĕнчех уявлама хушрĕ. Кашни чăвашшăн хаклă çак куна шкулсенче, аслă вĕренÿ заведенийĕсенче вĕренекенсем сумлăн паллă тума хатĕрленеççĕ.Чаплă, хисеплĕ çыннăмăр пурнăçĕпе, пултарулăхĕпе туллин паллашас тĕллевпе тĕрлĕрен ĕçсем йĕркелеççĕ. Эпир те сире, хаклă вулаканăмăрсем, И.Я.Яковлев пурнăçĕпе пултарулăхне халалланă викторинăна хутшăнма сĕнетпĕр. Унăн ыйтăвĕсем вара çапларах.
1. И.Я.Яковлев хăçан тата ăçта çуралнă?
2. Унăн ачалăхĕ çинчен мĕн пĕлнине çырăр.
3. Вăл ăçта-ăçта вĕреннĕ?
4. Ǎна чăваш ачисене Чĕмпĕре пухса вĕрентме камсем пулăшнă?
5. Чĕмпĕрти чăваш шкулĕнчи пĕрремĕш вĕренекен кам пулнă-ши? Ун çинчен кĕскен çырса кăтартăр.
6. 1871 çулта Иван Яковлев кам йěркелесе пынипе тата кам пулăшнипе чăваш алфавитне тăвать? Çав алфавитра миçе сас палли пулнă?
7. И.Я.Яковлевăн букварĕн малтанхи кăларăмĕ хăçан пичетленсе тухнă?
8. И.Я.Яковлев йĕркеленипе 1908 çулта чăваш литературин пĕрремĕш антологийĕ пичетленет. Çак антологи мĕнле ятпа тата мĕнле хайлавсемпе пичетленнĕ-ши?
9. «И.Н.Ульяновпа И.Я.Яковлев чăваш шкулĕнче» картинăна кам ÿкернĕ?
10. Чĕмпĕрти чăваш шкулĕнчен вĕренсе тухнă паллă çынсене асăнса тухăр.
11. И.Я.Яковлев миçемĕш çулта, ăçта вилнĕ?
12. И.Я.Яковлев пурнăçĕпе ĕçĕ-хĕлĕ çинчен çырнă тĕпчевçĕ ятне пĕлетĕр-и? Çак тĕпчевçĕ тата вăл Аслă вĕрентекенĕмĕр çинчен çырнă ĕçсене палăртăр.
13. Тĕп хуламăрта И.Я.Яковлев ячĕпе çыхăннă мĕнле паллă вырăнсене пĕлетĕр?
14. И.Я.Яковлевăн паллă тăхăмĕсем çинчен мĕн пĕлнине çырса кăтартăр.
Тулли те тĕрĕс хуравланă ĕçсене ака (апрель) уйăхĕн 7-мĕшĕччен «Тăван ен» хаçат редакцине tavan.en21@yandex.ru электрон почтăпа ярса памалла. Алăпа çырнă хуравсене те йышăнатпăр. Викторинăна хутшăнакансен ĕçĕсене Шупашкар муниципаллă округĕн вĕрентÿ учрежденийĕсенчи чăваш чĕлхи учителĕсем хак параççĕ – вĕсемех ыйтусене хатĕрленĕ. Çĕнтерÿçĕсене ака уйăхĕн 18-мĕшĕнче Тренккасси вăтам шкулĕнче чăваш чĕлхи кунне халалласа йĕркеленĕ уявра паха парнесемпе, дипломсемпе чыслатпăр. Хăш-пĕр ыйтăвăн чи ăнăçлă хуравĕсене «Шкул корреспонденчĕ» рубрикăра пичетлĕпĕр.