ՀՀ աշխատանքային օրենսգրքում սպասվում են լայնածավալ փոփոխություններ։ Այս մասին մամուլի ասուլիսի ժամանակ հայտարարեց ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը։ Նա ընդգծեց, որ փոփոխությունների փաթեթը նախաձեռնվել էր դեռևս 2019 թվականին։
«Եթե աշխատանքային օրենսգրքում ունենք 266 հոդված, շուրջ 122 հոդված վերանայման, փոփոխման են ենթարկվում։ Ինչո՞ւ եկանք այն եզրահանգման, որ փոփոխությունների կարիք կա։ Ունենք 3 պատճառ․ առաջինը պրակտիկայից եկած խնդիրներ են, երկրորդը՝ հաշվի առնելով զարգացումները, այսինքն՝ աշխատող-գործատու հարաբերությունները գնալով զարգանում են և աշխատանքային օրենսիրգքը պետք է համահունչ լինի այդ զրգացումներին և, երրորդը, միջազգային պարտավորություններին համապատասխանեցնելն է»,- նշեց փոխնախարարը։
Սարգսյանի խոսքով՝ օրենքը հավասարակշռող իրավական ակտ է և վերաբերում է ինչպես աշխատողներին, այնպես էլ գործատուներին։ Նա ընդգծեց, որ գլոբալ փոփոխությունները կարելի է բաժանել 6 կետի և ներկայացրեց կարևոր փոփոխությունները։
Փոփոխություններ՝ երեխաների աշխատանքային իրավունքներին վերաբերող հոդվածներում
Ռուբեն Սարգսյանը շեշտեց, որ երեխաները պարտադիր կրթության ժամկետից դուրս կարող են աշխատել։ Նաև նախատեսվել են փոփոխություններ, թե ինչ աշխատանք կարող են կատարել երեխաները։
«Հստակեցվել են նաև ժամային սահմանումները՝ որ տարիքային խումբը որքան կարող է աշխատել։ Բուն նպատակը երեխաների առողջության, հոգեբանական վիճակի, հոգեկան առողջության պաշտպանության համար մի քանի խնդիր լուծելն է»,- նշեց նա։
Մինչև 2 տարեկան երեխայի խնամք ունեցող կանանց աշխատանքային իրավունքները
Փոխնախարարը նշեց, որ արտոնություններ են նախատեսված մինչև երկու տարեկան երեխա ունեցող աշխատող կանանց համար։ Նախկինում երեխայի տարիքային շեմը մեկ տարեկանն էր։ Այս փոփոխությամբ հնարավորություն կտրվի երեխայի խնամքին ավելի շատ ժամանակ հատկացնել։
«Բացի այդ, երեխա ունեցող կանանց համար նախեսված էին 30 րոպեանոց ընդմիջումներ, դրանք կարող են միավորվել, այսինքն՝ կամ ուշ գան աշխատանքի, կամ ավելի շուտ գնան աշխատանքից։ Վստահ եմ՝ դա կօգնի իրենց երեխաներին մեծացնելու, խնամելու հարցում»։
Կենսաթոշակային տարիքի անձանց համար փոփոխություններ
Ռուբեն Սարգսյանը նշեց, որ փոփոխություններ են նախատեսված նաև կենսաթոշակային տարիքի անձանց համար։
«113-րդ հոդվածում նախատեսված էր աշխատանքային պայմանագրերի լուծման հիմք, դա կենսաթոշակային տարիքի հասնելն էր։ Նախագծով նախատեսում ենք այդ հիմքը հանել, որը ևս մի երաշխիք կլինի կենսաթոշակային աշխատողի համար շարունակել աշխատանքը»,- նշեց փոխնախարարը։
Սոցիալական երաշխիք՝ զինհաշմանդամություն ստացած ստացած անձանց համար
Փոխնախարարը տեղեկացրեց, որ սոցիալական հավելյալ երաշխիքներ են նախատեսված նաև զինհաշմանդամություն ստացած անձանց և նրանց ընտանիքի անդամների, ինչպես նաև ռազմական գործողությունների հետևանքով անհետ կորած, զոհված զինծառայողների ընտանիքների համար։
«Այսինքն՝ եթե տեղի է ունենում աշխատողների քանակի կամ հաստիքների կրճատում, ապա իրենց համար նախատեսվում են արտոնություններ։ Բոլոր դեպքերում, եթե հավասար պայմաններում են երկու աշխատող, որոնցից մեկն իմ նշած թիրախային խմբում է, նրան տրվում է արտոնություն և նա շարունակում է աշխատանքը»,- մանրամասնեց փոխնախարարը։
Արձակուրդի տրամադրման կարգի փոփոխություններ
Արձակուրդը տրամադրվում է 6 ամիս նույն գործատուի մոտ աշխատելու դեպքում, ասաց փոխնախարարը։ Ըստ առաջարկվող փոփոխության՝ այժմ գործատուի ցանկությամբ, համաձայնությամբ, եթե աշխատողը ևս ցանկանում է, նրա դիմումի հիման վրա տրամադրվում է արձակուրդ ավելի շուտ ժամկետում։
«Բացի այդ, եթե աշխատողը 2,5 տարի չի ներկայացնում արձակուրդ գնալու դիմում, ապա գործատուն իրավունք ունի սեփական ցանկությամբ որոշել, թե երբ աշխատողը գնա արձակուրդ։ Եթե աշխատողն իր հանգստի հնարավորությունը չի օգտագործում, նրա աշխատանքային արդյունավետությունը նվազում է։ Այսինքն՝ արձակուրդ գնալը պետք է լինի պարտադիր»,- ասաց նա։
Աշխատանքից ազատման կարգ․ ճկունություն աշխատող-գործատու հարաբերություններում
Ռուբեն Սարգսյանը նշեց, որ լինում են դեպքեր, որ աշխատողի ցանկությամբ է պայմանագիրը լուծարվում, և եթե նախկինում 30 օր պետք է շարունակեր աշխատանքը, նոր կարգով, եթե գործատուն դեմ չէ, ցանկացած պահի կարող է չաշխատել, սակայն աշխատողը պարտավոր է լինելու տույժ-տուգանք վճարել գործատուին։
Հեռավար աշխատանքի կարգավորումներ
Փոխնախարարը տեղեկացրեց, որ հեռավար աշխատանքը, նոր փոփոխությամբ, նախատեսվում է ոչ միայն ճգնաժամային իրավիճակներում, այլը գործատու-աշխատողի համաձայնությամբ։
Ռուբեն Սարգսյանը տեղեկացրեց, որ նախատեսում են ևս մի կարևոր բարեփոխում՝ Արտադատական աշխատանքային վեճերի լուծման ինստիտուտի ներդրումը, ինչը հնարավորություն կտա առկա վեճերը ոչ թե հասցնել դատարան, այլ լուծել մինչ դատարան հասնելը։ Այսպես, ըստ փոխնախարարի, կշահեն երկու կողմն էլ՝ խնայելով գումար, ժամանակ, նյարդեր։
Փոխնախարարը հիշեցրեց, որ սա դեռ նախագիծ է, որը կառավարության կողմից արժանացել է հավանության։ Դեռ նախատեսվում են ԱԺ-ում լսումներ, քննարկումներ, որից հետո վերջնական տարբերակը ԱԺ-ում կքննարկվի և նոր միայն կհաստատվի։
Մանրամասները՝ տեսանյութում։