Մոսկվան ողջունում է առաջընթացը հայ-թուրքական բանակցություններում, որը հեռանկարներ է բացում հայ-թուրքական հարաբերությունների վերականգնման համար, ասվում է 2022 թվականի ռուսական դիվանագիտության արդյունքներից հետո ՌԴ ԱԳՆ-ի՝ հունվարի 30-ին հրապարակված լրատվամիջոցների հարցերին տված պատասխաններում։
«Ռուսաստանի հովանու ներքո էր, որ այս նախաձեռնությունը մեկնարկեց 2022 թվականի հունվարին, երբ Մոսկվայում առաջին անգամ հանդիպեցին Հայաստանի հատուկ ներկայացուցիչներ Ռուբեն Ռուբինյանը և Թուրքիայի Սերդար Քըլըչը։ Երկուսի հետ էլ սերտ կապի մեջ ենք մինչ օրս։ Մենք ողջունում ենք վերջին զարգացումները, որոնք հեռանկարներ են բացում հայ-թուրքական հարաբերությունների վերականգնման համար, ինչը կնպաստի տարածաշրջանային իրավիճակի հետագա բարելավմանը»,- ասված է ՌԴ ԱԳՆ մեկնաբանության մեջ։
Մեկնաբանելով Անդրկովկասում ռազմավարությունն ու նպատակները՝ ՌԴ ԱԳՆ-ն հայտարարել է, որ Ռուսաստանը միտված է խթանելու 2021 թվականի դեկտեմբերին մեկնարկած 3+3 խորհրդատվական տարածաշրջանային պլատֆորմի աշխատանքը։
«Այս հարթակը, որտեղ նախատեսվում է կենտրոնանալ տարածաշրջանային խաղացողների շահերից ելնելով համագործակցության ամրապնդման գործնական հարցերի վրա, մենք համարում ենք օգտակար և ժամանակին»,- ասված է ՌԴ ԱԳՆ-ի պատասխանում։ Նրանք պարզաբանել են, որ սա 3 + 3 հարթակ է (Ադրբեջան, Հայաստան, Վրաստան և Ռուսաստան, Իրան և Թուրքիա), որը նախաձեռնել են Ադրբեջանը և Թուրքիան։
Հունվարի 6-ին ՀՀ ԱԳՆ մամուլի խոսնակ Վահան Հունանյանը հայտնել է, որ թուրքական կողմը Հայաստանին տեղեկացրել է օդային ուղիղ բեռնափոխադրումների արգելքի վերացման մասին։ Հայաստանի և Թուրքիայի հատուկ ներկայացուցիչներ, ԱԺ փոխխոսնակ Ռուբեն Ռուբինյանը և ԱՄՆ-ում Թուրքիայի նախկին դեսպան Սերդար Քըլըչը չորս հանդիպում են անցկացրել՝ մեկը Մոսկվայում, երեքը՝ Վիեննայում։ 2022 թվականի հուլիսի 1-ին Վիեննայում կայացած վերջին հանդիպմանը պայմանավորվածություն է ձեռք բերվել հնարավորինս սեղմ ժամկետներում ապահովել երրորդ երկրների քաղաքացիների կողմից հայ-թուրքական ցամաքային սահմանը հատելու հնարավորությունը և սկսել բեռների ուղիղ օդային փոխադրումներ Հայաստանի և Թուրքիայի միջև։