Թուրքիան կարող է դուրս գալ ՆԱՏՕ-ից վեց ամսվա ընթացքում, նման որոշում իրականում հրահրել է հենց դաշինքը, ասել է թուրքական «Հայրենիք» կուսակցության փոխնախագահ Էթհեմ Սանջաքը, հաղորդում են թուրքական լրատվամիջոցները։
«Թուրքիան կլքի ՆԱՏՕ-ն հինգ-վեց ամսից։ Նրանք փորձում են մեզ ներքաշել Մերձավոր Արևելքի հորձանուտը։ Վերջապես, դուք տեսնում եք Ղուրանի դեմ գործողություններ Շվեդիայում և Նիդերլանդներում»,- ասել է Սանջաքը:
Բնակչության հարցումները, ըստ թուրք քաղաքական գործչի, ցույց են տալիս, որ Թուրքիայի բնակիչների 80 տոկոսը ԱՄՆ-ին համարում է «Անկարայի դեմ թշնամական և ապակառուցողական քաղաքականություն վարող երկիր»։
«Վերջին շրջանում թուրք ժողովուրդը կրկին համակրում է Ռուսաստանին և Պուտինին։ Ժողովուրդը տեսավ մոտեցող սպառնալիքները և առաջ անցավ կառավարություններից»,- եզրափակել է քաղաքական գործիչը։
Թուրքիան և Հունաստանը ՆԱՏՕ-ին են միացել միաժամանակ՝ 1952 թվականին՝ Վաշինգտոնի պայմանագրի ստորագրումից երեք տարի անց։ Դա թույլ տվեց կազմակերպությանն ուժեղացնել իր «հարավային թևը»։